प्रकाशित मिति : जेष्ठ ३०, २०८२ शुक्रबार
थाइल्याण्डको फुकेटबाट भारतको राजधानी नयाँ दिल्लीतर्फ उडिरहेको एयर इण्डियाको एक उडानमा शुक्रबार बमको धम्की आएपछि विमानलाई आकस्मिक रूपमा फिर्ता अवतरण गराइएको छ।
फ्लाइट नम्बर एआई ३७९ मा सवार १५६ यात्रुहरूलाई आपतकालीन कार्ययोजनाअनुसार सुरक्षित रूपमा विमानबाट बाहिर निकालिएको थाईल्यान्डको विमानस्थल प्राधिकरणले जानकारी दिएको छ।
विमान शुक्रबार बिहान ९ः३० बजे (स्थानीय समय अनुसार) फुकेट विमानस्थलबाट दिल्लीका लागि उडेको थियो। तर अन्डमान समुद्र माथि ठूलो घुमाउरो लगाउँदै पुनः फुकेट विमानस्थलमै अवतरण गरियो। यो जानकारी उडान ट्र्याकिङ प्लेटफर्म फ्लाइटराडार २४ मार्फत पुष्टि भएको हो।
हालसम्म बमको धम्कीको स्रोत वा विवरणबारे कुनै जानकारी सार्वजनिक गरिएको छैन। एयर इण्डियाले समेत घटनाबारे कुनै प्रतिक्रिया दिएको छैन।
यो घटना एयर इण्डियाकै अर्को उडान बिहीबार अहमदाबादमा दुर्घटनामा परेर २४० भन्दा बढी मानिसको मृत्यु भएको दुःखद घटनापछि आएको हो। पछिल्लो समय भारतीय एयरलाइन्स र विमानस्थलहरूमा बमको झूटा धम्की आउने घटनाहरू बढ्दो अवस्थामा छन्।
सन् २०२४ को पहिलो १० महिनामै करिब १,००० झूटा धम्कीका कल र सन्देशहरू प्राप्त भएको जनाइएको छ, जुन २०२३ को तुलनामा १० गुणा बढी हो।
विमानस्थल सुरक्षाकर्मीहरू र सम्बन्धित निकायले विमान र यात्रुहरूको सुरक्षालाई ध्यानमा राख्दै आवश्यक अनुसन्धान अघि बढाएको जनाइएको छ।