प्रकाशित मिति : १६ असार २०८३, मंगलबार
Photo: Coalesce Digital/ Unsplash
क्यालिफोर्नियाको यातायात विभागले आप्रवासी अधिकारवादीहरूको तीव्र विरोधका बाबजुद चालक अनुमतिपत्र र परिचयपत्रको विवरण एउटा बाह्य नेटवर्कसँग साझा गर्ने तयारी पूरा गरेको छ। अधिकारवादीहरूले यो कदमले गर्दा कागजातविहीन आप्रवासीहरू देश निकालाको जोखिममा पर्न सक्ने भन्दै चिन्ता व्यक्त गरेका छन्।
क्यालिफोर्निया संसदले गत सोमबार पारित गरेको नयाँ राज्य बजेटमार्फत यो डाटा साझा गर्ने योजनालाई अनुमति दिएको हो। यससँगै एउटा छुट्टै यातायात विधेयक पनि ल्याइएको छ, जसमा डाटा सुरक्षित राख्नका लागि विशेष अनुगमन प्रक्रियाहरू व्यवस्था गरिएको छ।
गभर्नर ग्याभिन न्यूसमले बजेटमा हस्ताक्षर गरिसकेका छन् भने आफ्नो प्रशासनले सांसदहरूसँग मिलेर तयार पारेको उक्त सहयोगी विधेयकलाई पनि उनले छिट्टै प्रमाणीकरण गर्ने अपेक्षा गरिएको छ।
यो निर्णयबाट क्यालिफोर्नियामा चालक अनुमतिपत्र लिएका १० लाखभन्दा बढी आप्रवासीहरू प्रत्यक्ष प्रभावित हुनेछन्। यो प्रणालीले चालकको सामाजिक सुरक्षा नम्बरको अन्तिम पाँच अंक रेकर्ड गर्छ। सामाजिक सुरक्षा नम्बर नहुनेहरूका लागि भने ‘९९९९९’ कोड प्रयोग गरिन्छ।
अधिकारवादीहरूको डर के छ भने, यो विवरण राष्ट्रिय डेटाबेसमा समावेश गर्दा संघीय अध्यागमन अधिकारीहरूले सजिलै कागजातविहीन मानिसहरूलाई पहिचान गर्न सक्छन्। गत अप्रिल महिनामा अधिकारवादीहरूले यो योजनालाई “विश्वासघात” को संज्ञा दिएका थिए।
यद्यपि, राज्यका अधिकारीहरूले संघीय ‘रियल आईडी एक्ट’को पालना गर्न यो डाटा साझेदारी आवश्यक रहेको तर्क गरेका छन्। यदि क्यालिफोर्निया यसमा सहभागी नभएमा डिपार्टमेन्ट अफ होमल्यान्ड सेकुरिटिले विमानस्थलहरूमा यहाँको राज्य परिचयपत्रलाई मान्यता नदिन सक्ने चेतावनी उनीहरूले दिएका छन्। अधिकारीहरूका अनुसार यो प्रणालीबाट एक पटकमा केवल एक जनाको मात्र विवरण खोजी गर्न सकिन्छ र एकैसाथ धेरै जनाको डाटा निकाल्न सम्भव छैन।