प्रकाशित मिति : २८ चैत्र २०८२, शनिबार
अमेरिकाको क्यालिफोर्नियाका सांसद एरिक स्वालवेलमाथि अनुसन्धान सुरु भएको छ। उनीमाथि लागेको यौन दुर्व्यवहारको आरोपबारे म्यानह्याटन जिल्ला सरकारी वकिल (डिस्ट्रिक्ट अटर्नी) को कार्यालयले अनुसन्धान सुरु गरेको जनाएको छ।
पूर्व कर्मचारीले स्वालवेलविरुद्ध यौन दुर्व्यवहारको गम्भीर आरोप लगाएको समाचार सार्वजनिक भएको भोलिपल्टै उक्त कार्यालयले यो कदम चालेको हो।
जिल्ला सरकारी वकिलको कार्यालयले भनेको छ, “यी आरोपबारे जानकारी भएका वा पीडित भएका व्यक्तिहरूलाई हाम्रो विशेष पीडित विभागमा सम्पर्क गर्न आग्रह गर्दछौँ।” साथै, उनीहरूले आफ्नो प्रशिक्षित टोलीले पीडितमैत्री र संवेदनशील ढङ्गले सहयोग गर्ने प्रतिबद्धता समेत जनाएका छन्।
पूर्व कर्मचारीका अनुसार, सन् २०२४ अप्रिलमा न्युयोर्क सहरमा स्वालवेलसँगै मदिरा सेवन गरेपछि उनी अत्यधिक नशामा थिइन्। होटलको ओछ्यानमा ब्यूँझिँदा स्वालवेलले आफूलाई सहमतिविना यौन सम्पर्क गरिरहेको उनको दाबी छ। उनले भनिन्, “म ‘होइन’ भन्दै उनलाई हटाउन खोज्दै थिएँ, तर उनले रोकेनन्।” यो घटना आफूले स्वालवेलको कार्यालयबाट काम छोडिसकेपछि भएको उनले उल्लेख गरेकी छन्।
स्वालवेलविरुद्ध दुर्व्यवहारको आरोप लगाउने चार महिलामध्ये उनी एक हुन्। अन्य महिलाहरूले पनि स्वालवेलले आफूहरूलाई अनुमतिबिना नग्न तस्बिर वा अश्लील सन्देश पठाएको आरोप लगाएका छन्।
स्वालवेलले भने यी सबै आरोप अस्वीकार गरेका छन्। उनले सामाजिक सञ्जालमा पोस्ट गरेको एक भिडियोमार्फत भनेका छन्, “यी आरोपहरू झुटा हुन् र गभर्नरको चुनावको पूर्वसन्ध्यामा मलाई फसाउन ल्याइएका हुन्।”
उनले थप भने, “करिब २० वर्षदेखि म सार्वजनिक सेवामा छु अभियोजक र कंग्रेस सदस्यका रूपमा र मैले सधैं महिलाको अधिकार र सुरक्षाको सम्मान गरेको छु। म तथ्यका आधारमा आफ्नो बचाउ गर्नेछु र आवश्यक परे कानुनी कदम चाल्नेछु।”
यी आरोपहरूले स्वालवेलको गभर्नर पदको चुनावी अभियानमा ठूलो धक्का पुर्याएको छ। पूर्व अभियोजक समेत रहेका स्वालवेल सन् २०२० मा राष्ट्रपति पदका लागि डेमोक्र्याटिक प्राथमिक निर्वाचनमा उम्मेदवार बनेका थिए।
क्यालिफोर्निया लगायत देशभरका प्रभावशाली डेमोक्र्याट नेताहरूले उनलाई उम्मेदवारी पुनर्विचार गर्न वा चुनावी मैदान छोड्न आग्रह गरेका छन्। यद्यपि, उनले अहिलेसम्म आफ्नो अर्को कदमबारे केही स्पष्ट पारेका छैनन्। क्यालिफोर्नियामा सबै दल सहभागी हुने प्राथमिक निर्वाचन आगामी जुन २ मा हुँदैछ।