प्रकाशित मिति : भाद्र १९, २०८१ बुधबार
अमेरिकी राष्ट्रपति उम्मेदबार कमला ह्यारिसले नयाँ साना व्यवसायलाई ५० हजार डलरसम्मको ट्रयाक्स ब्रेक दिने प्रस्ताव सार्वजनिक गरेकी छिन् । ह्यारिसले बुधवार प्रस्ताव गरेका नीतिहरू अमेरिकाभरि साना व्यवसायहरू सिर्जना गर्न मद्दत गर्नका लागि घोषणा गरिएका हुन् ।
उनले साना व्यवसाय कर क्रेडिट ५ हजार डलरबाट ५० हजार डलर बनाएर दस गुणा विस्तार गर्न चाहेको घोषणा गरेकी छिन् । उनको नीतिले नयाँ व्यवसायलाई ४० हजार डलरको औसत लागत कभर गर्न मद्दत गर्नेछ । अर्थात् अमेरिकामा नयाँ व्यवसायको औषत लागत खर्च ४० हजार डलर रहेको छ ।
उनले आफ्नो पहिलो कार्यकालमा २५ मिलियन नयाँ साना व्यवसाय आवेदनहरू प्राप्त गर्ने लक्ष्य पनि तय गरिरहेकी छिन्, जुन प्रशासन अन्तर्गत दायर गरिएका १९ मिलियन नयाँ साना व्यवसायभन्दा माथि हो ।
राष्ट्रपतिका रुपमा आफ्नो उच्च प्राथमिकताहरू मध्ये एक अमेरिकाका साना व्यवसायहरूलाई सुदृढ पार्नु रहेको ह्यारिसले बुधवार बताइन् । नयाँ साना व्यवसायहरूको संख्या बढाउनुको अतिरिक्त अवस्थित कम्पनीहरूलाई विस्तार गर्न सजिलो बनाउने समेत उनले लक्ष्य राखेकी छिन् ।
ह्यारिसले १ मिलियनभन्दा बढी कमाउनेहरुका लागि २८ प्रतिशत पुँजीगत लाभ कर दरको प्रस्ताव गरेकी छिन् । बाइडेनले आर्थिक बर्ष २०२५ को बजेट प्रस्तावमा यो दर ३९ दशमलव ६ तोकेका छन् । हाल यो दर २३ दशमलव ८ प्रतिशत रहेको छ ।
ह्यारिसले उद्यमीहरूलाई सफल हुन गाह्रो बनाउन सक्ने केही वित्तीय अवरोधहरू हटाएर व्यवसायहरु बढाउन सजिलो बनाउने लक्ष्य राखेकी छिन्। ह्यारिसको कर कटौती प्रस्तावले नयाँ व्यवसायहरूलाई आफ्नो कर बिल घटाउनेगरी क्रेडिट दाबी गर्न नाफा नभएसम्म पर्खन समय दिनेछ ।
ह्यारिसले साना व्यवसायका लागि मानक कटौतीको विकास गरेर कम्पनीहरूलाई व्यवसायिक इजाजतपत्र प्राप्त गर्न सजिलो बनाउने र राज्य तथा स्थानीय सरकारहरूलाई साना व्यवसायहरूको बृद्धिविकाशलाई हानि पुर्याउन सक्ने नियमहरू खुकुलो बनाउन प्रोत्साहन गर्ने प्रस्ताव राखेका छन्।
अमेरिकामा ३३ मिलियन साना व्यवसायहरूले सबै निजी क्षेत्रका कर्मचारीहरूमध्ये ४६ प्रतिशतलाई रोजगारी दिदै आएका छन् । सन् २०१९ यता थपिएका नयाँ रोजगारीमा ७० प्रतिशत साना व्यवसायले प्रदान गरेका रोजगारीहरु थिए ।
