प्रकाशित मिति : ३ जेष्ठ २०८३, आइतबार
अमेरिकाका कलेज तथा विश्वविद्यालयहरूमा नयाँ विदेशी स्नातक तहका विद्यार्थी भर्ना यस वर्षको वसन्त सत्रमा औसत २० प्रतिशतले घटेको पाइएको छ। शिक्षा क्षेत्रसँग सम्बन्धित संस्थाहरूको गठबन्धनले सार्वजनिक गरेको अध्ययनले राष्ट्रपति डोनाल्ड ट्रम्प नेतृत्वको प्रशासनको उच्च शिक्षामाथिको दबाब र आप्रवासन नीतिले अमेरिकी शैक्षिक क्षेत्रलाई प्रत्यक्ष असर पार्न थालेको संकेत गरेको छ।
अमेरिकी अन्तर्राष्ट्रिय शिक्षा संस्था नाफ्सासहितका संस्थाहरूले हालै सार्वजनिक गरेको प्रतिवेदन १४९ अमेरिकी शैक्षिक संस्थामा गरिएको सर्वेक्षणमा आधारित छ। सर्वेक्षणमा सहभागीमध्ये ६२ प्रतिशत संस्थाले सन् २०२५ को वसन्त सत्रको तुलनामा स्नातक र स्नातकोत्तर दुवै तहमा विदेशी विद्यार्थी संख्या घटेको बताएका छन्।
प्रतिवेदनअनुसार स्नातकोत्तर तहमा विदेशी विद्यार्थी भर्ना अझ तीव्र रूपमा घटेको छ। उक्त तहमा औसत २४ प्रतिशतले विद्यार्थी संख्या कम भएको उल्लेख गरिएको छ।
अन्तर्राष्ट्रिय विद्यार्थीहरू अमेरिकी विश्वविद्यालयका लागि महत्वपूर्ण आर्थिक स्रोत मानिन्छन्। उनीहरूले प्रायः पूर्ण शुल्क तिर्ने भएकाले विश्वविद्यालयहरूको आम्दानीमा ठूलो योगदान दिने गर्छन्। विशेषगरी अमेरिकाभित्र विद्यार्थी जनसंख्या वृद्धिदर घटिरहेको अवस्थामा विदेशी विद्यार्थी विश्वविद्यालयहरूको आर्थिक आधारका रूपमा झन् महत्वपूर्ण बन्दै गएका छन्।
तर ट्रम्प प्रशासनले उच्च शिक्षा प्रणाली पुनःसंरचना गर्ने र आप्रवासनका बाटाहरू थप सीमित गर्ने आफ्नो व्यापक नीतिअन्तर्गत विदेशी विद्यार्थी भर्नामाथि कडाइ गर्दै आएको छ। अध्ययनले पनि यही नीतिको प्रभाव देखिन थालेको निष्कर्ष निकालेको छ।
वसन्त सत्रमा तुलनात्मक रूपमा कम विद्यार्थीले अध्ययन सुरु गर्ने भए पनि यस अवधिको भर्ना प्रवृत्तिलाई आगामी शरद सत्रको संकेतका रूपमा हेरिन्छ, जहाँ भर्ना संख्या निकै बढी हुने गर्छ।
यदि शरद सत्रमा पनि विदेशी विद्यार्थी संख्या करिब २० प्रतिशतकै हाराहारीमा घट्यो भने कतिपय विश्वविद्यालय र कलेजहरूले गम्भीर बजेट अभाव झेल्नुपर्ने चेतावनी अध्ययनले दिएको छ।
प्रतिवेदनले अमेरिकी शैक्षिक संस्थाहरूका लागि निर्णायक मोड गत वर्षको वसन्तमा आएको उल्लेख गरेको छ। त्यतिबेला अमेरिकी इमिग्रेसन एन्ड कस्टम्स इन्फोर्समेन्ट (आइस)का एजेन्टहरूले दर्जनौं विदेशी विद्यार्थीलाई पक्राउ गरी हिरासतमा लिएका थिए।
केही विद्यार्थीलाई क्याम्पस वा छात्रावासभित्रै नियन्त्रणमा लिइएको थियो भने हजारौं विद्यार्थीको कानुनी बसोबासको स्थिति समेत खारेज गरिएको थियो।
यद्यपि प्रशासनले अदालतमा लगातार चुनौतीहरू बेहोरेपछि धेरै विद्यार्थीको स्थिति पुनःस्थापना गरिएको थियो। तर त्यस घटनाले विदेशी विद्यार्थी समुदायमा दीर्घकालीन डर र अनिश्चितता सिर्जना गरेको प्रतिवेदनमा उल्लेख छ।
गत शरद सत्रमा अमेरिकामा समग्र अन्तर्राष्ट्रिय विद्यार्थी भर्ना अघिल्लो वर्षको तुलनामा १ दशमलव ४ प्रतिशतले घटेको थियो। तर त्यस समय अध्ययन सुरु गर्ने धेरै विद्यार्थीले आवेदन प्रक्रिया ह्वाइट हाउसले आफ्नो कडा नीति लागू गर्नुअघि नै सुरु गरिसकेका थिए।
मार्च महिनादेखि आइसले विदेशी विद्यार्थीमाथि निगरानी र कारबाही बढाएको थियो। त्यसपछि मे महिनामा अमेरिकी विदेश मन्त्रालयले नयाँ कडा समीक्षा नीति लागू गर्ने तयारीस्वरूप विद्यार्थी भिसा अन्तर्वार्ता प्रक्रिया अस्थायी रूपमा रोकेको थियो।
नाफ्साकी कार्यकारी निर्देशक फ्यान्टा अले सर्वेक्षणको नतिजाले आगामी शरद सत्रमा अझ गम्भीर गिरावटको संकेत गरेको बताएकी छन्।
उनका अनुसार अन्तर्राष्ट्रिय विद्यार्थीहरूले सामान्य अवस्थामा पनि लामो भिसा प्रक्रिया सामना गर्नुपर्ने हुन्छ। धेरै विद्यार्थीले अध्ययन सुरु हुनुभन्दा एक वर्ष वा त्योभन्दा अगाडि नै आवेदन दिने भएकाले गत वर्षको अनिश्चितता र नीतिगत परिवर्तनको पूर्ण प्रभाव आगामी विद्यार्थी समूहमा अझ स्पष्ट रूपमा देखिने सम्भावना रहेको छ।