१५ असोज, धनगढी । धनगढीमा सुरु भएको दशौं संस्करणको एसपीए लिटल फ्लावर प्राइड लिगको पहिलो दिन मोर्निङ ग्लोरी स्कुल, घोडाघोडी सामुदायिक विद्यालय र चेतना पाठशाला विजयी भएका छन् ।
उद्घाटन खेलमा महेन्द्रनगरको मोर्निङ ग्लोरी स्कुलले सुख्खडको घोडाघोडी एकेडेमीलाई नौ विकेटले पराजित गर्यो। घोडाघोडीले दिएको ८३ रनको लक्ष्य मोर्निङ ग्लोरीले ८.२ ओभरमा एक विकेट गुमाएर पूरा गर्यो ।
मोर्निङ ग्लोरीका अभिषेक थापाले अविजित ४१ तथा इशान दौल्यालले ३१ रन बनाए। घोडाघोडीका सन्तोष विश्वकर्माले एक विकेट लिए ।
त्यसअघि टस जितेर ब्याटिङ गरेको घोडाघोडी एकेडेमी १३.२ ओभरमा ८२ रनमा अलआउट भएको थियो। कृष्ण भट्ट र सन्दीप बिष्टले समान १६ तथा अयुब चन्दले १२ रन बनाए। मोर्निङ ग्लोरीका कप्तान नगेन्द्र उपाध्यायले तीन विकेट लिए। आर्यन बिष्ट, जेरी चन्द र निमेश पन्तले दुई–दुई तथा साजन बिटालुले एक विकेट लिए। अभिषेक थापा प्लेयर अफ द म्याच बने।
दोस्रो खेलमा घोडाघोडी सामुदायिक विद्यालयले धनगढी योद्धालाई १० रनले हरायो। घोडाघोडीले दिएको १२७ रनको लक्ष्य पछ्याएको धनगढी योद्धाले निर्धारित १५ ओभरमा आठ विकेट गुमाएर ११७ रन मात्र बनाउन सक्यो। दीपक रोकायाले २८ तथा दिनेश वडले २२ रन बनाए।
घोडाघोडी सामुदायिकका सुजन गौतमले चार विकेट लिए। हिमाल पन्तले दुई तथा ट्राभिस जैसी र हेमन्त बुढाले एक–एक विकेट लिए।
यसअघि पहिले ब्याटिङ गरेको घोडाघोडी सामुदायिक विद्यालयले १२.४ ओभरमा सबै विकेट गुमाएर १२७ रन बनाएको थियो। दिनेश रावतले १९ बलमा सात चौका र तीन छक्कासहित ५२ रन बनाए। धनगढी योद्धाका कप्तान दीपक कप्डेलले पाँच विकेट लिए। खगेन्द्र सुनारले दुई तथा सौर्य श्रेष्ठ र दीपक रोकायाले एक–एक विकेट लिए। दिनेश रावत प्लेयर अफ द म्याच चुनिए।
पहिलो दिनको तेस्रो खेलमा चेतना पाठशालाले ऐश्वर्य विद्या निकेतनलाई ५७ रनले पराजित गर्यो। चेतना पाठशालाले दिएको १४३ रनको लक्ष्य पछ्याएको ऐश्वर्यले निर्धारित १५ ओभरमा नौ विकेट गुमाएर ८५ रन मात्र बनाउन सक्यो। हिमाल बोगटीले ३२ रन बनाए।
चेतना पाठशालाका कप्तान अनिल रावतले तीन विकेट लिए। बिराज बिष्ट र धीरेन्द्र सुनारले दुई–दुई तथा सुभम बमले एक विकेट लिए।
त्यसअघि पहिले ब्याटिङ गरेको चेतना पाठशालाले निर्धारित १५ ओभरमा ६ विकेट गुमाएर १४२ रन बनाएको थियो। हिमाल खड्काले २९ बलमा तीन चौका र तीन छक्कासहित ५३ रन बनाए। अविरल विकले ३२ तथा अभिनव शाहले २६ रन जोडे। ऐश्वर्यका मनिष भट्टले तीन तथा हिमाल बोगटीले एक विकेट लिए। हिमाल खड्का प्लेयर अफ द म्याच बने।
प्रतियोगिताको उद्घाटन कैलाली क्षेत्र नम्बर ५ का प्रतिनिधिसभा सदस्य डा. आनन्दबहादुर चन्दले गरेका थिए। उद्घाटनका क्रममा उनले निर्वाचनका बेला फाप्ला क्रिकेट मैदान आफ्नै कार्यकालमा निर्माण गर्ने प्रतिबद्धता जनाएको र त्यसमा आफू प्रतिबद्ध रहेको बताए। उनले फाप्ला निर्माणका लागि ठेक्का लाग्ने अन्तिम तयारी भइरहेको र निर्माणको काम छिट्टै अघि बढ्ने बताए।
लिटल फ्लावर स्पोर्ट्स एन्ड इभेन्ट्स प्रालिका अध्यक्ष रामचन्द्र शाहीको अध्यक्षतामा भएको उद्घाटन समारोहमा खेलप्रेमीहरूको उपस्थिति थियो।
असोज २१ गतेसम्म सञ्चालन हुने प्रतियोगितामा देशभरका १५ टोली सहभागी छन्। विजेताले दुई लाख रुपैयाँसहित ट्रफी, मेडल र प्रमाणपत्र तथा उपविजेताले एक लाख रुपैयाँसहित ट्रफी, मेडल र प्रमाणपत्र प्राप्त गर्नेछन्। विधागत उत्कृष्ट खेलाडीलाई नगदसहित ट्रफी प्रदान गरिनेछ भने प्रत्येक खेलका प्लेयर अफ द म्याचले एक हजार रुपैयाँ प्राप्त गर्नेछन्।