सुदूरपश्चिम र जाउलाखेलबीचको खेल ।
४ चैत, काठमाडौं । उपाधि दाबेदार हेल्प नेपाल क्लबले आठौं आरबीबी एनभीए राष्ट्रिय महिला तथा पुरुष भलिबल च्याम्पियनसिपमा कोशी प्रदेशलाई सोझो सेटमा पराजित गर्दै विजयी सुरुवात गरेको छ ।
राष्ट्रिय खेलकुद परिषद् (राखेप) को त्रिपुरेश्वरस्थित कभर्डहलमा भएको दोस्रो दिनको अन्तिम खेलमा हेल्प नेपालले २५–१९,२६–२४,२५–१५ सोझो सेटमा जित हात पार्यो । त्यसअघि मणिमुकुन्द भलिबल क्लब, बुढानीलकण्ठ र सुदूरपश्चिम प्रदेश विजयी भएका थिए । महिलातर्फ नेपाल पुलिस क्लब र एपीएफले जित हात पारे ।
मणिमुकुन्दले न्यूटन भलिबल क्लबलाई २९–२७,२५–२३,२५–२३ को सोझो सेटमा हारायो । बुढानीलकण्ठ भलिबल क्लबले कर्णाली प्रदेशलाई २५–१०,२५–१८,२५– १७ को सोझो सेटमा हराएको थियो । सुदूरपश्चिम प्रदेशले जावलाखेल भलिबल क्लबलाई २५–२१, २५–१३,२५–१७ ले हरायो । दोस्रो दिन पुरुषतर्फ भएका चार खेल नै सोझो सेटमा सकिएका थिए ।
महिलातर्फ पुलिसले कर्णाली प्रदेशलाई २५–१२,२५–७,२५–८ को सोझो सेटमा हराएको थियो । एपिएफ क्लबले मधेश प्रदेशलाई २५–८, २५–७,२५–२ को सहज जित हात पारेको थियो ।
महिलातर्फ समूह ए मा नेपाल पुलिस क्लब, त्रिभुवन आर्मी क्लब, एभरेष्ट भलिबल क्लब र कर्णाली प्रदेश छन् । समूह बी मा चन्द्रागिरी नगरपालिका न्यू डायमन्ड, नेपाल एपीएफ क्लब र मधेश प्रदेश छन् ।
पुरुषतर्फ समूह ए मा हेल्प नेपाल स्पोर्टस क्लब, कोशी प्रदेश र ढोरपाटन क्लब छन् । समूह बी मा नेपाल एपीएफ क्लब, सुदूरपश्चिम प्रदेश र जावलाखेल भलिबल प्रशिक्षण केन्द्र छन् ।
समूह सी मा नेपाल पुलिस क्लब, कर्णाली प्रदेश र बुढानिलकण्ठ भलिबल क्लब छन् । समूह डी मा त्रिभुवन आर्मी क्लब, गण्डकी प्रदेश, मणिमुकुन्द भलिबल क्लब र न्युटन भलिबल क्लब छन् ।
च्याम्पियनसिपबाट महिलातर्फ शीर्ष ६ र पुरुषतर्फ ८ शीर्ष टोली एनभिए लिगका लागि छनोट हुनेछन् । प्रतियोगिताको दुवै तर्फको विजेताले ५ लाख, दोस्रोले २ लाख ५० हजार र तेस्रो टोलीले १ लाख २५ हजार रुपैयाँ प्राप्त गर्नेछन् ।
तस्वीरहरु : विकास श्रेष्ठ/अनलाइनखबर ।
