प्रकाशित मिति : १७ असार २०८३, बुधबार
Photo: Osmany M Leyva Aldana/ Unsplash
फ्लोरिडाका स्थानीय कानुन कार्यान्वयन गर्ने निकायहरूलाई सङ्घीय सरकारको आप्रवासन नियन्त्रण अभियानमा सहयोग गर्न कानुनी रूपमा अनिवार्य गरिएको एक वर्षभन्दा बढी भइसकेको छ। यद्यपि, राज्यका केही ठूला शेरिफ र प्रहरी विभागहरू सहित कतिपय निकायहरू अझै पनि यस प्रक्रियामा सहभागी भएका छैनन्।
राज्य आप्रवासन प्रवर्तन परिषद्को मंगलबार बसेको बैठकमा फ्लोरिडाका उच्च प्रहरी अधिकारीहरूले कतिपय निकायहरूले राष्ट्रपति डोनाल्ड ट्रम्पको आप्रवासन सम्बन्धी एजेन्डामा न्यून सहयोग गरेको वा पूर्ण रूपमा बेवास्ता गरेको बताएका छन्। गभर्नर रोन डिसेन्टिसले यस एजेन्डालाई उच्च प्राथमिकता दिँदै अगाडि बढाएका छन्।
फ्लोरिडा कानुन प्रवर्तन विभागको तथ्याङ्क अनुसार, राज्यका कुल ३९४ सुरक्षा निकायहरू मध्ये २७२ वटाले ‘२८७(जी)’ कार्यदल सम्झौतामा हस्ताक्षर गरेका छन्। ती २७२ मध्ये १६३ निकायहरू मात्रै “सक्रिय रूपमा परिचालन” छन्, जसको अर्थ उनीहरूले आप्रवासन कानुन उल्लंघन गर्ने कम्तीमा एक जनालाई पक्राउ गरिसकेका छन्। बाँकी १०९ निकायहरूले भने अहिलेसम्म कसैलाई पनि पक्राउ गरेका छैनन्।
परिषद्ले अब ती सुस्त निकायहरूलाई पत्र पठाई राज्यको कानुन पालना गर्न, गैरकानुनी आप्रवासन नियन्त्रणमा सङ्घीय सरकारलाई सघाउन र मासिक विवरण बुझाउन सचेत गराउने भएको छ। परिषद्का अध्यक्ष एवं पोल्क काउन्टीका शेरिफ ग्रेडी जुडले भने, म उनीहरूलाई काम गर्न प्रोत्साहन गर्न चाहन्छु। कानुन पालना नगरेकै कारण उनीहरू सार्वजनिक रूपमा आलोचित वा अपमानित भएको म हेर्न चाहन्न।
काउन्सिलले ती निकायहरूलाई आवश्यक मान्यता प्राप्त गर्न, कानुनी पक्राउको प्रक्रिया सुरु गर्न र फ्लोरिडाको विशेष डिजिटल ड्यासबोर्डमा तथ्याङ्क प्रविष्टि गर्न सिक्ने समय दिएको थियो। काउन्सिलका सदस्य एवं पिनेलास काउन्टीका शेरिफ बब गुआल्टिएरीले सुरुवाती चरणमा सबैलाई अभ्यस्त हुन समय दिए पनि अब त्यो समय सकिएको र सबैले कानुन पालना गर्नैपर्ने स्पष्ट पारेका छन्।
