प्रकाशित मिति : २८ असार २०८३, आइतबार
Photo:krzhck/Unsplash
लस एन्जलस प्रहरी विभागले स्वचालित रूपमा गाडीको लाइसेन्स प्लेट नम्बर पढ्ने ‘फ्लक सेफ्टी’का निगरानी क्यामेराहरूको प्रयोगमा रोक लगाएको छ। संकलित डाटाको नियन्त्रण कसको हातमा हुने र त्यसलाई अध्यागमन अधिकारी लगायत अन्य संघीय निकायहरूसँग कसरी साझा गरिन्छ भन्ने विषयमा गम्भीर चिन्ताहरू सार्वजनिक भएपछि प्रहरीले यो कदम चालेको हो।
विभागका इन्स्पेक्टर जनरल म्याथ्यु बारागनको पछिल्लो अडिट प्रतिवेदनले गोपनीयता, सुरक्षा र जवाफदेहिता सुनिश्चित गर्ने कडा नियमहरू नबन्दासम्म नयाँ क्यामेरा जडान र सम्झौताहरू पूर्ण रूपमा रोक्न सिफारिस गरेको थियो। सोही प्रतिवेदनका आधारमा एलएपीडीले शनिवारदेखि फ्लकसँगको सहकार्य स्थगित गरेको हो।
अमेरिकाभरिका करिब ५,००० सुरक्षा निकायहरूसँग व्यावसायिक काम गरिरहेको फ्लक सेफ्टी कम्पनीले भने यी चिन्ताहरूलाई “भ्रम” को संज्ञा दिएको छ। कम्पनीका प्रवक्ताले एलएपीडीको यस निर्णयप्रति आश्चर्य प्रकट गर्दै छलफलका माध्यमबाट चाँडै असमझदारी हट्ने र साझेदारी ब्युँतिने विश्वास व्यक्त गरेका छन्।
यता, लस एन्जलसको डाउनटाउनमा अधिकारवादी तथा प्रदर्शनकारीहरूले सर्वसाधारण चालकहरूमाथि भइरहेको यस्तो डिजिटल निगरानी तत्काल बन्द गर्न माग गर्दै प्रदर्शन गरिरहेका छन्। ‘स्टप एलएपीडी स्पाईङ’ जस्ता नागरिक अधिकारवादी समूहहरूले सम्झौता परिमार्जन गर्ने मात्र नभई यस्ता निगरानी प्रविधिहरूको प्रयोग पूर्ण रूपमा खारेज हुनुपर्ने अडान राख्दै आएका छन्।
यसअघि, क्यालिफोर्नियाकै माउन्टेन भ्यू सहरले पनि आफ्नो नीति विपरीत संघीय निकायहरूले सहरको डाटामा पहुँच पाएको थाहा पाएपछि गत फेब्रुअरीमा फ्लकसँगको सम्झौता रद्द गरिसकेको छ। एलएपीडी र फ्लक सेफ्टीबीच सन् २०२३ मा भएको तीन वर्षे सम्झौताको म्याद पनि यसै शनिवार सकिएको सन्दर्भमा अब नयाँ सर्त र कडा कानुनी प्रावधानबिना सम्झौता नवीकरण नहुने एलएपीडीका मुख्य सूचना अधिकारी डीन गियालामासले स्पष्ट पारेका छन्।