प्रकाशित मिति : २८ फाल्गुन २०८२, बिहिबार
Photo by Tingey Injury Law Firm
मेरील्याण्डका एक संघीय न्यायाधीशले राज्य सरकारको वातावरणीय चिन्तालाई सम्बोधन गर्दै ट्रम्प प्रशासनले बनाउन लागेको एक ठूलो आप्रवासी हिरासत केन्द्रको निर्माण कार्य तत्काल रोक्न ‘अस्थायी प्रतिबन्धात्मक आदेश’ जारी गरेका छन्। मेरील्याण्ड राज्यले दायर गरेको मुद्दामा सुनुवाइ गर्दै न्यायाधीशले निर्माण कार्यमा रोक लगाएका हुन्।
मेरील्याण्डका महान्यायाधिवक्ता एन्थोनी ब्राउनले राष्ट्रपति डोनाल्ड ट्रम्पको प्रशासनले उचित वातावरणीय समीक्षा नगरेको र सार्वजनिक परामर्शको प्रक्रिया समेत मिचेको तर्क अघि सारेका थिए। संघीय सरकारले वाशिङ्गटन काउन्टीस्थित ५४ एकडमा फैलिएको एउटा गोदामलाई १५ सय जना क्षमताको हिरासत केन्द्रमा बदल्न १०० मिलियन डलरभन्दा बढी खर्च गरिसकेको छ।
अमेरिकी जिल्ला न्यायाधीश ब्रेन्डन हर्सनले मेरील्याण्डको अनुरोध स्वीकार गर्दै आगामी १४ दिनका लागि निर्माण कार्य पूर्ण रूपमा ठप्प पार्न आदेश दिएका हुन्। न्यायाधीशले आफ्नो फैसलामा भनेका छन्, “प्रतिवादीहरू (संघीय सरकार) ले ‘राष्ट्रिय वातावरणीय नीति ऐन’ अन्तर्गतका आफ्ना दायित्वहरू पालना नगरेको देखिन्छ। उनीहरूले यस योजनाको वातावरणीय प्रभावबारे गम्भीर अध्ययन गरेको पाइएन।”
डिपार्टमेन्ट अफ होमल्याण्ड सेक्युरिटीले भने राज्यका अधिकारीहरूसँग मिलेर काम गर्न इच्छुक रहेको बताउँदै आएको छ। यद्यपि, उसले मेरील्याण्डले लगाएको वातावरणीय आरोपहरूलाई अस्वीकार गरेको छ। ट्रम्प प्रशासनले अवैध आप्रवासन रोक्न र आन्तरिक सुरक्षा सुदृढ गर्न भन्दै देशव्यापी रूपमा देशनिकाला र धरपकडलाई तीव्रता दिइरहेको छ।
अदालतको यो आदेशपछि महान्यायाधिवक्ता ब्राउनले यसलाई ठूलो जितको रूपमा व्याख्या गरेका छन्। उनले भनेका छन्, “यो आदेश अस्थायी भए पनि यसले डिपोर्टेशनको हतारोमा कानूनी प्रक्रिया मिच्ने डीएचएस र आईसको कदमलाई रोकेको छ। हामी हाम्रो कानूनी लडाइँ जारी राख्नेछौं।”