काठमाडौं । देशभर अविरल वर्षासँगै आएको बाढी र पहिरोले सडक यातायात र हवाई सेवा प्रभावित बनेको छ । बंगालको खाडीबाट उत्पन्न जलवाष्पयुक्त हावा र न्यूनचापीय प्रणालीका कारण भएको बदलीले भारी वर्षा हुँदा देशको प्रमुख राजमार्ग शुक्रबार दिनभर अस्तव्यस्त बन्यो ।
मुख्य राजमार्ग ठाउँ–ठाउँमा अवरुद्ध, हवाई सेवा प्रभावित
निरन्तरको वर्षासँगै उपत्यकालगायत मुलुकका अधिकांश नदीनालामा जलसतह बढेको छ । काठमाडौंको बाग्मती, विष्णुमती, धोबिखोला, ललिपुरको कर्मानासा, भक्तपुरको हनुमन्ते खोलामा जलसतह उच्च तहसम्म पुगेको छ ।
बिहीबारदेखि निरन्तर वर्षा भएसँगै जल तथा मौसम विज्ञान विभागले मोबाइलमार्फत सूचना पठाएर आवश्यक सतर्कता अपनाउन आग्रह गरेको छ । काठमाडौं उपत्यकास्थित बाग्मती नदी, खोकना, मनोहरा, गौरीघाट, बल्खुखोला बलम्बु र विष्णुमती गोंगबु बसपार्क जलमापन केन्द्रमा हालको जलसतह सतर्कता तह पार गरेको र बढ्दो क्रममा भएकाले नदीतटीय क्षेत्रमा यात्रा गर्ने र बस्नेले उच्च सतर्कता अपनाउन विभागले अनुरोध गरेको छ । विभागले ललितपुर, मकवानपुर, सर्लाही र रौतहटका नदीतटीय क्षेत्रहरूमा शनिबार दिउँसोसम्मै उच्च सतर्कता अपनाउन आग्रह गरेको छ ।
बिहीबारदेखि शुक्रबार साँझसम्म कोशी, मधेस, बाग्मती, गण्डकी र लुम्बिनी प्रदेशका धेरै स्थानमा भारी वर्षा भइरहेको विभागले जनाएको छ । विभागका अनुसार मधेस प्रदेश, लुम्बिनी प्रदेशको नवलपरासी (बर्दघाट सुस्ता पश्चिम), रूपन्देही, कपिलवस्तु, गण्डकी र बाग्मती प्रदेशका अधिकांश साना नदीहरूमा बहाव सतर्कता तह आसपास रहेको छ । साथै, आगामी १२ घण्टा देशका विभिन्न नदीमा बाढीको उच्च जोखिम रहेकाले आवश्यक सतर्कता अपनाउन आग्रह गरिएको छ ।
साथै, विभागका अनुसार कोशी प्रदेशको झापा, इलामलगायत क्षेत्रमा अति भारी वर्षा भएको छ । २४ घण्टाको अवधिमा झापाको अनारमणीमा २ सय ३ मिलिमिटर, चन्द्रगढी विमानस्थलमा २ सय ६० मिलिमिटर र इलाममा २ सय ४३ मिलिमिटर वर्षा मापन गरिएको मौसमविद् बिनु महर्जनले जानकारी दिइन् । काठमाडौंका थोरै स्थानमा भारी वर्षा भएको छ । कीर्तिपुरमा ८४ मिलिमिटर, बूढानीलकण्ठमा ६५ मिलिमिटर र काठमाडौंका अन्य क्षेत्रमा ६० मिलिमिटरभन्दा बढी वर्षा मापन गरिएको महाशाखाले जनाएको छ । ललितपुरको लेलेमा १ सय १५ दशमलव ५ र गोदावरीमा ९३ दशमलव ८ मिलिमिटर वर्षा मापन गरिएको छ ।
त्यस्तै, कोशी प्रदेशअन्तर्गत झापाका चार स्थान र इलामको एक स्थानमा अति भारी वर्षा भएको छ । महाशाखाले सार्वजनिक गरेको विवरणनुसार झापास्थित चन्द्रगढी विमानस्थलमा ३ सय १ मिलिमिटर, अनारमणी बिर्तामा २ सय ५२ मिलिमिटर, गौरादहमा २ सय ५० दशमलव ४ र केचनामा २ सय ३४ दशमलव ४ तथा इलामको कन्काई मैनाचुलीमा २ सय ९८ दशमलव ६ मिलिमिटर वर्षा भएको हो । मौसमविद्का अनुसार २४ घण्टामा २ सय मिलिमिटरभन्दा माथि वर्षा हुनुलाई अति भारी वर्षा भनिन्छ । यस्तै, सय मिलिमिटरभन्दा माथिको वर्षालाई धेरै भारी वर्षा भनिन्छ भने ५० मिलिमिटरभन्दा माथिको वर्षालाई भारी वर्षा भनिन्छ ।
झापामा खोलाले बगाएर ३ जना बेपत्ता
लगातारको झरीका कारण खोला नदीमा आएको बाढीले बनाउँदा झापामा ३ जना बेपत्ता भएका छन् । बेपत्ता हुनेमा एक बालिका तथा दुई पुरुष रहेको जिल्ला प्रहरी कार्यालयले जनाएको छ । शुक्रबार साँझ करिब ६ बजे झापाको कमल गाउँपालिका–१ स्थित किस्ने खोलामा माछा मार्ने क्रममा सोही ठाउँका ३५ वर्षीय टीकाराम चौधरीलाई खोलाले बगाएको थियो ।
यसैगरी, गौरीगञ्ज गाउँपालिका–३ र २ को सिमानामा रहेको हुलाकी सडकमा पर्ने किस्ने खोलाको पुलबाट एक व्यक्ति हामफालेर बेपत्ता भएका छन् । शुक्रबार अपराह्न करिब ४ बजे गौरीगञ्ज–२ भाकुरमारी सुकुम्वासी बस्ती बस्ने अन्दाजी वर्ष ५० का केमालाल ताजपुरिया हामफालेर बेपत्ता भएको प्रहरीले जनाएको छ ।
अविरल वर्षाका कारण खोलामा आएको बाढीले उहाँको खोजीमा समस्या भएको छ । नदीको पानीको बहाव उच्च रहेकाले खोजी कार्यमा समस्या भएको इलाका प्रहरी कार्यालय गौरीगञ्जका प्रहरी निरीक्षक रामचन्द्र साहले बताए ।
त्यसैगरी कचनकवल गाउँपालिका–१ स्थित चमरभित्ताबाट झकुवा टोल आउँदै गरेकी सोही ठाउँकी पञ्चु राजवंशीकी १४ वर्षीया छोरी नेहारिकालाई जमुवा खोलाले बगाएको छ । अपराह्न करिब ४:४० बजे सो घटना’bout प्रहरीमा जानकारी आएको थियो । खोलामा बेपत्ता कमलका चौधरी, गौरीगञ्जका ताजपुरिया र कचनकवलकी पञ्चुको खोजीमा स्थानीय प्रहरी र स्थानीवासीहरू जुटे पनि फेला पार्न नसकिएको जिल्ला प्रहरी कार्यालय झापाका प्रवक्ता प्रहरी नायव उपरीक्षक कृष्णकुमार चन्दले जानकारी दिए ।
वर्षासँगैको पहिरोले मुख्य राजमार्ग अवरुद्ध
राजधानी प्रवेश गर्ने पृथ्वी राजमार्गका ठाउँ–ठाउँमा गएको पहिरोले दिनभरजसो अवरुद्ध बन्न पुग्यो । नौबिसे नागढुंगा सडक अवरुद्ध हुँदा काठमाडौं भित्रने र बाहिरिने सवारीसाधन बीचबाटोमै रोकिएका थिए । धादिङको धुनिबेंसीको सिस्नेखोलामा पहिरोसँगै आएको लेदोका कारण धादिङको नौबिसे नागढुंगा खण्ड अवरुद्ध भएको थियो । सुरुङमार्गको प्रवेशद्वार अगाडिपट्टि आएको पहिरोबाट झरेको लेदो सडकमा आउँदा शुक्रबार दिनभर यातायातका साधन आवातजावत गर्न कठिन भयो । काठमाडौं प्रवेशद्वारछेवैमा सडक अवरुद्ध हुँदा संघीय राजधानी प्रवेश गर्ने र बाहिरिने यात्रु अलपत्र परेका थिए । पहिरो पन्छाउन समय लागेपछि काठमाडौं प्रवेश गर्ने साना सवारीले धार्के–सीतापाइलाको सडक प्रयोग गरेका थिए ।
त्यस्तै, मध्यपहाडी लोकमार्गअन्तर्गत हलेसी तुवाचुङ नगरपालिका–७ हलेसीमहादेवस्थानको बर्खेटारमा पहिरोले सडक अवरुद्ध बन्न पुगेको थियो । तुवाचुङडाँडा क्षेत्रबाट पहिरो खसेर सडक पुर्दा यातायात अवरुद्ध भएको थियो । सडक अवरुद्धपछि दिक्तेलबाट काठमाडौं, विराटनगर, धरानलगायतका सहर जाने सवारीसाधन अर्खौलेमा र काठमाडौंलगायत अन्य सहरहरूबाट दिक्तेल, भोजपुर जाने सवारीसाधन हलेसीमा रोकिएका थिए ।
साथै, हेटौंडाबाट काठमाडौं भित्रिने छोटो दूरीको वैकल्पिक सडक भीमफेदी–कुलेखानी–फाखेल सडकखण्डको सुकौरामा गएको पहिरोले सडक अवरुद्ध भएको थियो । मकवानपुरको इन्द्रसरोवर गाउँपालिका–२ सुकौरामा गएको पहिरोले सडक अवरुद्ध भएको जिल्ला प्रहरी कार्यालय हेटौंडाले जनाएको छ । त्यस्तै, हेटौंडा–काठमाडौं जोड्ने कान्तिलोकपथ सडक पनि अवरुद्ध भएको थियो । मकवानपुरको बकैया गाउँपालिका–१२ घट्टेपाखास्थित कान्ति लोकपथ सडकखण्डमा वर्षाका कारण माथिबाट पहिरो खसेर सडक अवरोध भएको थियो ।
सडकमा खसेको अवरोध पन्छाउन पनि वर्षाका कारणले समस्या भएको थियो । त्यस्तै, अविरल वर्षासँगै पहिरो खस्दा मनाङको चामे–बेंसीसहर सडक अवरुद्ध भएको छ । लमजुङको मस्र्याङ्दी गाउँपालिका–४ काभ्रेभीरमा पहिरो खस्दा सडक अवरुद्ध भएको हो । काभ्रेभीरमा पहिरो खस्दा एक मात्र मनाङ आवतजावत गर्ने चामे–बेंसीसहर सडक अवरुद्ध भएको प्रमुख जिल्ला अधिकारी मात्रिका आचार्यले जानकारी दिए ।
त्यस्तै, भारी वर्षाका कारण राष्ट्रिय गौरवको आयोजनाको कालीगण्डकी कोरिडोर अवरुद्ध भएको छ । कोरिडोरको बागलुङ नगरपालिका–१० दब्ल्याङमा लेदोसहित पहिरो झर्दा कोरिडोर पूर्ण रूपमा बन्द भएको हो । दुई महिनादेखि बन्द रहँदै आएको सो सडकखण्ड बिहीबार मात्रै सञ्चालनमा आएको थियो ।
तर, भारी वर्षाका कारण कोरिडोर अवरुद्ध भएको छ । यस्तै, सिद्धार्थ राजमार्गअन्तर्गत बर्तुङ–दोभान खण्डको केराबारीमा पहिरो खसेपछि सडक अवरुद्ध भएको छ । पाल्पाको तिनाउ गाउँपालिका–५ मस्याम केराबारीनजिकै खसेको पहिरोले सडक अवरुद्ध भएको हो । सडक डिभिजन पाल्पाले सडक खुलाउने प्रयास गरे पनि ठूला ढुंगा हटाउन नसक्दा खुलाउन नसकेको जनाएको छ ।
हवाई सेवा प्रभावित, अधिकांश उडान रद्द
मुलुकका मुख्य विमानस्थलबाट शुक्रबार अधिकांश उडान हुन सकेनन् । श्री एयरलाइन्सले एक–दुईवटा उडान भरेको थियो । बुद्ध एयरले मौसममा बदली भएका कारण शुक्रबारका सबै पर्वतीय उडान रद्द गरेको जनाएको छ । साथै, यती एयरले पाँचवटा उडान भरेको थियो भने कम भिजिबिलिटीका कारण मुख्य विमानस्थलमा हुने अधिकांश उडान रद्द गरिएको यती एयरलाइन्सले जनाएको छ ।
वर्षासँगै बादलले आकाश ढाकेका कारण आन्तरिक उडान प्रभावित भएको त्रिभुवन अन्तर्राष्ट्रिय विमानस्थलका प्रवक्ता रिञ्जी शेर्पाले जानकारी दिए । भारी वर्षाका कारण भद्रपुर, विराटनगर, सिमरा, भरतपुर, पोखरा, सुर्खेतमा शुक्रबारका लागि तय नियमित उडान रद्द भएका छन् । प्रवक्ता शेर्पाका अनुसार काठमाडौं विमानस्थलको भिजिबिलिटी (दृश्यता) ३ किलोमिटर हाराहारीमा झरेको छ । हेरेर हुने उडानका लागि ५ किलोमिटर भिजिबिलिटी आवश्यक पर्छ ।
विगत १५ घण्टायता निरन्तरको वर्षाका कारण मुलुकका आन्तरिक तथा अन्तर्राष्ट्रियतर्फका हवाई उडान प्रभावित भएका छन् । आन्तरिकतर्फ अधिकांश विमानस्थलमा उडान हुन सकेन भने अन्तर्राष्ट्रिय उडानतर्फ केही विमान लामो समय होल्ड भएर अवतरण गरेका थिए । क्यानका अनुसार हाल आन्तरिकतर्फ बिहान ६ बजेदेखि राति १० बजेसम्म उडान हुँदै आएको छ ।
शुक्रबार ५६ वटा अन्तर्राष्ट्रिय उडानको तालिका रहेकामा आन्तरिकतर्फ दुईतर्फी गरेर ३ सयवटा उडान गर्न सातवटा आन्तरिक वायुसेवाको तालिका थियो । बिहान ६ बजेदेखि राति १० बजेसम्म आन्तरिक वायुसेवाले सुगम रुटमा उडान गर्छन् ।
(Visited 28 times, 1 visits today)
