प्रकाशित मिति : माघ १८, २०८१ शुक्रबार
भेजेजुएलाले ६ जना अमेरिकी बन्दीहरुलाई मुक्त गरेको छ । क्याराकसमा राष्ट्रपति निकोलस मादुरो र ट्रम्प प्रशासनका अधिकारीबीच भएको वार्तापछि ६ जना अमेरिकी बन्दीहरुलाई भेनेजुएलाले मुक्त गरेको हो ।
राष्ट्रपति डोनाल्ड ट्रम्प र उनका विशेष दूत रिचार्ड ग्रेनेलले सामाजिक सञ्जाल मार्फत मुक्त हुनेको नाम घोषणा गरेका थिए ।
अमेरिकी बन्धक लाई मुक्त नगरे र अमेरिकाले निर्वासित गरेका भेनेजुएलाली अपराधीलाई स्वीकृति नदिए गम्भीर परिणामको सामना गर्नुपर्ने चेतावनी भेनेजुएलालाई दिएको थियो ।
ट्रम्पले छुट्टै पोस्टमा यो कदमको सराहना गर्दै ग्रेनेलले भेनेजुएलाबाट ६ जना बन्धकलाई घर ल्याउँदै गरेको लेखेका छन ।
भेनेजुएलाको सरकारी मिडियाले ट्रम्पका दूतसँगको वार्ता सम्मानजनक रहेको उल्लेख गरेको छ । जनवरी महिनामा क्याराकसले भाडाका सैनिक समात्ने क्रममा ति ६ जना अमेरिकी नागरिकहरू पनि समातिएका थिए ।
मादुरोले गत महिना आफ्नो तेस्रो कार्यकालको लागि शपथ लिएका थिए । जुलाई २०२४ को चुनावको आधिकारिक नतिजालाई अन्तर्राष्ट्रिय समुदाय, विशेष गरी अमेरिकाले मान्यता दिएका छैनन ।
ग्रेनेलको भ्रमणले भेनेजुएलाको वैध नेता को हो भन्ने बारेमा अमेरिकी मान्यता नजनाएको ह्वाइट हाउसले बताएको छ ।