प्रकाशित मिति : २ श्रावण २०८३, शनिबार
Photo: Kevin Walker/ Unsplash
शनिबार मध्याह्न न्यूयोर्क सिटी र न्यू जर्सीका विभिन्न भागमा आएको भीषण बाढीपछि राति पुनः शक्तिशाली आँधीबेहरी र भारी वर्षा भएको छ। राष्ट्रिय मौसम सेवाले न्यू जर्सी, न्यूयोर्क सिटी र वेष्टचेस्टर काउन्टीका केही क्षेत्रहरूमा राति ११:३० बजेसम्मका लागि ‘फ्ल्यास फ्लड वार्निङ’ जारी गरेको थियो।
मौसम पूर्वानुमानकर्ताहरूले सर्वसाधारणलाई बाढीग्रस्त सडक वा भवनहरूमा प्रवेश नगर्न सख्त चेतावनी दिएका छन्। यसअघि न्यू जर्सीका लागि जारी गरिएको टर्नेडोको चेतावनी हटे पनि थप बाढी आउन सक्ने जोखिम कायमै रहेको बताइएको छ।
मौसम खराबीका कारण यातायात र मनोरञ्जन क्षेत्र नराम्ररी प्रभावित भएका छन्, उत्तर-पूर्वी क्षेत्रमा १,००० भन्दा बढी उडानहरू रद्द भएका छन् भने ४,००० भन्दा बढी उडानहरू ढिलो भएका छन्। न्यूयोर्क र फिलाडेल्फियाका मुख्य विमानस्थलहरूमा विमानको आवतजावत ठप्प भएको थियो।
न्यू जर्सी ट्रान्जिटको रेल सेवा बाढीका कारण प्रभावित भएको छ र केही रेलहरूले न्यूआर्क विमानस्थल स्टेशन बाइपास गर्नुपरेको छ।शनिबार राति यान्की र डजर्सबीच हुने भनिएको बेसबल खेल स्थगित गरी आइतबारका लागि सारिएको छ। त्यसैगरी, सिटी फिल्डमा हुने तय भएको नोआ काहानको साङ्गीतिक कन्सर्ट पनि मौसमकै कारण रद्द गरिएको छ।
क्विन्स र न्यूआर्क क्षेत्रमा बाढीले उग्र रूप लिएको छ। क्विन्सको एउटा सबवे स्टेशनमा पानी पसेपछि यात्रुहरू घुँडाभन्दा माथिसम्मको पानीमा हिँड्न बाध्य भएका थिए। धेरै ठाउँमा सडकहरू खोला जस्तै बगेका थिए, जहाँ गाडीहरू डुबेपछि अग्निनियन्त्रकहरूले चालकहरूको उद्धार गरेका थिए।
शनिबार बिहान क्यानडाको डढेलोको धुवाँका कारण न्यूयोर्क र वरपरको क्षेत्रको वायु गुणस्तर सूचकांक १७३ सम्म पुगेको थियो, जुन स्वास्थ्यका लागि निकै हानिकारक मानिन्छ। दिउँसोको वर्षाले धुवाँ त हटाउने काम गर्यो, तर त्यससँगै आएको भीषण आँधीले बाढी र विनाश निम्त्यायो।
न्यूयोर्ककी गभर्नर क्याथी होचुलले नागरिकहरूलाई सतर्क रहन र मौसम सम्बन्धी आधिकारिक अपडेटहरू नियमित रूपमा हेर्न अपिल गर्नुभएको छ।