प्रकाशित मिति : २६ जेष्ठ २०८३, मंगलबार
ज्येष्ठ नागरिकहरूको स्वास्थ्य र समग्र कल्याणप्रति आफ्नो प्रतिबद्धतालाई थप मजबुत बनाउँदै न्युयोर्कको न्यु लाइफ सिनियर केयर सेन्टरले हालै अत्याधुनिक स्वास्थ्य निगरानी कुर्सी सञ्चालनमा ल्याएको छ। नयाँ प्रविधियुक्त उक्त उपकरणमार्फत रक्तचाप, मुटुको धड्कन, शरीरको तापक्रम, अक्सिजनको मात्रा लगायतका महत्वपूर्ण स्वास्थ्य सूचकहरू छिटो र सहज रूपमा जाँच गर्न सकिने जनाइएको छ।
एल्महर्स्टस्थित न्यु लाइफ सिनियर केयर सेन्टर नेपाली समुदायका ज्येष्ठ नागरिकहरूलाई लक्षित गरी सञ्चालन गरिएको सामाजिक वयस्क दिवा हेरचाह केन्द्र हो। केन्द्रले ज्येष्ठ नागरिकहरूलाई सुरक्षित, सम्मानजनक र सक्रिय वातावरण प्रदान गर्दै स्वास्थ्य, सामाजिक सहभागिता तथा सांस्कृतिक गतिविधिहरूमार्फत जीवनस्तर सुधारमा सहयोग पुर्याउँदै आएको छ।
केन्द्रका अनुसार नयाँ स्वास्थ्य निगरानी प्रणालीले ज्येष्ठ नागरिकहरूको स्वास्थ्य अवस्थाको नियमित अभिलेख राख्न, सम्भावित स्वास्थ्य जोखिमको प्रारम्भिक पहिचान गर्न तथा आवश्यक परेमा स्वास्थ्य सेवा प्रदायकहरूसँग जानकारी आदानप्रदान गर्न सहयोग गर्नेछ। यसले ज्येष्ठ नागरिक र उनीहरूका परिवारलाई स्वास्थ्य अवस्थाबारे थप जानकारी र आत्मविश्वास प्रदान गर्ने अपेक्षा गरिएको छ।
क्विन्सको एल्महर्स्टमा रहेको केन्द्र नेपाली समुदायका ज्येष्ठ नागरिकहरूबीच सामाजिक सम्बन्ध विस्तार गर्ने, एक्लोपन कम गर्ने तथा शारीरिक र मानसिक रूपमा सक्रिय राख्ने उद्देश्यले विभिन्न कार्यक्रम सञ्चालन गर्दै आएको छ। योग, व्यायाम, सांस्कृतिक कार्यक्रम, मनोरञ्जनात्मक गतिविधि तथा स्वास्थ्यसम्बन्धी सेवाहरू केन्द्रका प्रमुख कार्यक्रमहरूमा पर्दछन्।
न्यु लाइफ सिनियर केयर सेन्टरले विशेष गरी काममा व्यस्त सन्तान भएका वा दिनभर घरमा एक्लै बस्नुपर्ने अवस्थाका ज्येष्ठ नागरिकहरूलाई समुदायसँग जोडेर राख्न महत्वपूर्ण भूमिका खेलिरहेको छ। केन्द्रले नेपाली भाषा, संस्कृति र परम्परालाई सम्मान गर्दै ज्येष्ठ नागरिकहरूको आवश्यकताअनुसार सेवा प्रदान गर्ने गरेको जनाएको छ।
सेन्टरका प्रतिनिधिहरूका अनुसार अत्याधुनिक स्वास्थ्य निगरानी कुर्सीको सुरुआतसँगै ज्येष्ठ नागरिकहरूको स्वास्थ्य व्यवस्थापनलाई अझ प्रभावकारी बनाउने लक्ष्य लिइएको छ। स्वास्थ्य सेवा र सामाजिक सहभागितालाई एकैसाथ प्राथमिकता दिँदै केन्द्रले नेपाली समुदायका ज्येष्ठ नागरिकहरूलाई स्वस्थ, सक्रिय र सम्मानजनक जीवनयापनमा सहयोग पुर्याइरहेको जनाएको छ।