प्रकाशित मिति : असार २०, २०८१ बिहीबार
टी–२० विश्वकप २०२४ को उपाधि जितेको भारतीय टोली बार्बाडोसबाट भारत आइपुगेको छ । भारतीय टोली १६ घण्टाको लामो उडानपछि स्वदेश फर्किएको छ ।
बेरील आँधीका कारण टोली बार्बाडोसमा रोकिनुपरेको थियो । आँधीका कारण बार्बाडोसको विमानस्थल बन्द गरिएको थियो ।
टोली दिल्ली एयरपोर्टमा पुग्ने बित्तिकै उनीहरुको भव्य स्वागत गरिएको थियो । स्वागतका लागि विमानस्थलमा फ्यानहरु पहिल्यै देखि नै थिए ।
टोली एयरपोर्टबाट दिल्लीको आईटीसी मौर्य होटल पुगेको छ । भारतीय सञ्चारमाध्यमका अनुसार टीम इन्डियाले आज दिउँसो प्रधानमन्त्री नरेन्द्र मोदीलाई भेट्नेछ।
कप्तान रोहित शर्माले ट्वीट गर्दै जुलाई ४ मा साँझ ५ बजेदेखि टोलीले मुम्बईको मरिन ड्राइभ र वानखेडे स्टेडियममा विजयको उत्सव मनाउने परेड निकाल्ने जानकारी दिएका छन् ।
बार्बाडोसमा जुन २९ मा भएको अन्तिम टी–२० खेलमा भारतले दक्षिण अफ्रिकालाई ७ रनले पराजित गरेको थियो । रोहित शर्माको कप्तानीमा भारतले १७ वर्षपछि टी–२० विश्वकप जितेको छ ।
