प्रकाशित मिति : २ श्रावण २०८३, शनिबार
तस्बिर: जुलिया डेमारी निकिन्सन / एपी/रासस
अमेरिकी राष्ट्रपति डोनाल्ड ट्रम्पले राष्ट्रका नाममा एक सम्बोधन गर्दै विगतको निर्वाचनमा व्यापक धाँधली भएको पुष्टि गर्ने दाबीसहित केही गोप्य दस्तावेजहरू सार्वजनिक गरेका छन्। ट्रम्पका सहयोगीहरूले यसलाई सन् २०२० को चुनावमा भएको धाँधली प्रमाणित गर्ने बलियो प्रमाणको रूपमा प्रचार गरेका थिए। तर, समाचार एजेन्सी एसोसिएटेड प्रेसको विस्तृत समीक्षाले ती दस्तावेजहरूमा दाबी गरिए बमोजिमको कुनै पनि ठोस प्रमाण फेला नपरेको उल्लेख गरेको छ।
बिहीबार राति ह्वाइट हाउसबाट सम्बोधन गर्दै ट्रम्पले सन् २०२० को राष्ट्रपतीय निर्वाचनमा आफ्नो पराजय सुनिश्चित गर्न चीनले हस्तक्षेप गरेको र ‘डिप स्टेट’ले त्यसलाई लुकाएको आरोप लगाएका थिए। उनले भने, अमेरिकी निर्वाचन पूर्वाधारको सुरक्षाका विषयमा जनतासँग सरासर झूट बोलिएको थियो।
तथापि, हालै सार्वजनिक गरिएका भर्खरै वर्गीकरणमुक्त गरिएका प्रतिवेदन, अनुसन्धान फाइल, गुप्तचर विश्लेषण र पत्राचारहरूको अध्ययन गर्दा त्यस्ता दाबीहरूको पुष्टि कतै पनि नभएको पाइएको छ। सार्वजनिक गरिएका कतिपय पृष्ठहरूमा धेरै सामग्रीहरू धमिलो पारिएका हुनाले तिनको निष्कर्ष अस्पष्ट छ भने अन्य पृष्ठहरूमा विगत लामो समयदेखि सार्वजनिक भइसकेका सामान्य चुनावी कमजोरी र मूल्याङ्कनहरू मात्र समेटिएका छन्। सन् २०२० वा अन्य कुनै पनि वर्षको चुनावमा चीन वा अन्य कुनै विदेशी शक्तिले मत परिणाम फेरबदल गरेको कुनै प्रमाण फेला परेको छैन।
निर्वाचन नवीनता तथा अनुसन्धान केन्द्रका कार्यकारी निर्देशक डेभिड बेकरले यस विषयमा टिप्पणी गर्दै भने, ह्वाइट हाउसले ठूलो रहस्योद्घाटन गर्ने बाचा गरेको थियो, तर नतिजा शून्य आयो। प्रशासनका अधिकारीहरूको ठूलो कसरतका बाबजुद ती दस्तावेजमा नयाँ कुरा केही थिएन। यसले विगतका चुनाव र विशेष गरी सन् २०२० को चुनावको वैधतामाथि कुनै प्रश्न खडा गर्दैन।
सम्बोधनका क्रममा ट्रम्पले सन् २०२० को चुनावताका चीनले अमेरिकी इतिहासकै सबैभन्दा ठूलो चुनावी डाटा चोरी गरी २२ करोड अमेरिकी मतदाताहरूको विवरण अवैध रूपमा प्राप्त गरेको दाबी गरे।
तर, चीनले उक्त विवरणको प्रयोग गरेर चुनाव प्रभावित पारेको कुनै प्रमाण छैन। सार्वजनिक रूपमा उपलब्ध हुने मतदाता सूचिहरू राजनीतिक दल र अभियानहरूले घरदैलो तथा प्रचारप्रसारका लागि सहजै खरिद-बिक्री गर्न सक्छन्। चीनले विगतमा पनि अमेरिकी नागरिकहरूको ठूलो परिमाणमा तथ्याङ्क सङ्कलन गर्ने गरेको भए तापनि त्यसको उद्देश्य मत परिणाम बदल्नु नभएको सुरक्षा अधिकारीहरू बताउँछन्। चीनले ट्रम्पको यो आरोपलाई ‘आधारहीन र पूर्ण रूपमा मनगढन्ते’ भन्दै खारेज गरेको छ।
ट्रम्पले डिपार्टमेन्ट अफ होमल्यान्ड सेक्युरिटीको नयाँ अनुसन्धानलाई उद्धृत गर्दै क्यालिफोर्निया, पेन्सिल्भेनिया, न्युजर्सी र नेभाडा लगायतका राज्यमा करिब २ लाख ७८ हजार गैर-नागरिकहरू मतदाता सूचीमा दर्ता भएको दाबी गरे।
तर, ती सूचीमा रहेका व्यक्तिहरूले वास्तवमै मतदान गरेको कुनै आरोप वा प्रमाण छैन। गैर-नागरिकले संघीय चुनावमा मतदान गर्नु कानुनी अपराध हो। विज्ञहरूका अनुसार, ट्रम्पले उल्लेख गरेको ‘सेभ’ डाटाबेसमा पुराना र त्रुटिपूर्ण विवरणहरू धेरै छन्, जसले गर्दा अमेरिकी नागरिकता पाइसकेका व्यक्तिहरूलाई पनि गैर-नागरिकको रूपमा देखाउने गर्दछ। अमेरिकामा गैर-नागरिकहरूले मतदान गर्ने दर अत्यन्तै न्यून रहेको अध्ययनहरूले देखाएका छन्।
ट्रम्पले सन् २०१६ को चुनावमा आफूलाई जिताउन रूसले सहयोग गरेको गुप्तचर निकायको निष्कर्षलाई लामो समयदेखि अस्वीकार गर्दै आएका थिए। तर, अहिले सार्वजनिक भएकै एक दस्ताबेजले रूसले सन् २०२० मा जो बाइडेनलाई हराउन र ट्रम्पलाई जिताउन प्रयास गरेको खुलासा गरेको छ।
राष्ट्रिय गुप्तचर परिषद्को उक्त दस्ताबेज अनुसार, रूसले बाइडेन र उनका छोरा हन्टर बाइडेन जोडिएको युक्रेनी ऊर्जा कम्पनी ‘बुरिस्मा’ को विवादलाई बढी उचाल्ने काम गरेको थियो। प्रतिवेदनको चार्टमा चीन र इरानले ट्रम्पको पराजय चाहेको उल्लेख भए तापनि निर्वाचन प्रणाली नै ह्याक गर्ने वा फेरबदल गर्ने प्रयासमा भने रूस मात्र संलग्न रहेको जनाइएको छ। रूसले भने यी आरोपहरूको खण्डन गर्दै आएको छ।