प्रकाशित मिति : २७ फाल्गुन २०८२, बुधबार
अमेरिकाले इरानविरुद्ध सुरु भएको युद्धमा करिब १४० आफ्ना सैनिक घाइते भएको पुष्टि गरेको छ। पेन्टागनका अनुसार अधिकांश घाइते सामान्य छन् भने आठ सैनिक गम्भीर घाइते छन् । घाइतेहरुको उपचार भइरहेको छ ।
पेन्टागनका प्रवक्ता सियन पार्नेलका अनुसार ‘अपरेशन एपिक फ्युरी’ सुरु भएको १० दिनमा करिब १४० अमेरिकी सैनिक घाइते भएका छन्। १०८ सैनिकले पहिले नै आफ्नो कर्तव्यमा फर्किसकेका छन्।
अमेरिकी सेनाले इरानी आक्रमणमा सात सैनिकको मृत्यु भएको र कुवेतमा एक सैनिकको स्वास्थ्यसम्बन्धी कारणले निधन भएको जानकारी दिएको छ।
इरानले अमेरिकी–इजरायली आक्रमणपछि मध्यपूर्वस्थित अमेरिकी ठेगाना र इजरायलमा मिसाइल तथा ड्रोन हमलाबाट प्रतिक्रिया दिएको छ। यस अभियानमा सर्वोच्च नेता अली खामेनीसहित १,२५० भन्दा बढी नागरिकको मृत्यु भएको थियो।
राष्ट्रपति डोनाल्ड ट्रम्पले इरानमा अमेरिकी सेना तैनाथ गर्ने सम्भावनालाई अझै खुला राखेका छन्। उनले सोमबार युद्ध “दमदार र पूरा” भएको र चाँडै समाप्त हुने बताएका थिए। तर, उनका सहायकहरूले भने युद्ध अझै सुरु भएको र सबै उद्देश्य पूरा नभएसम्म जारी रहने बताएका छन्।
ह्वाइट हाउसकी प्रवक्ता क्यारोलिन लिभिटले अमेरिकी आक्रमण निर्धारित समयभन्दा अघि बढिरहेको र मुख्य उद्देश्यहरू (मिसाइल नष्ट गर्ने, नौसेना कमजोर गर्ने, परमाणु हतियारबाट वञ्चित गर्ने र आतंकवादी सहयोगीहरूलाई कमजोर बनाउने) हासिल गर्न लागिरहेको बताइन्।
इरानले सधैं आफ्नो परमाणु कार्यक्रम शान्तिपूर्ण भएको दाबी गर्दै आएको छ। तर अमेरिकाले जून २०२५ मा इरानी तीन परमाणु सुविधामा आक्रमणपछि उक्त कार्यक्रम ध्वस्त भएको दाबी गरेको थियो।