प्रकाशित मिति : २ जेष्ठ २०८३, शनिबार
फोटो होमल्याण्ड सेक्युरिटी
जम्मा ५ हजार ५ सय मात्र जनसङ्ख्या भएको जर्जियाको एउटा सानो सहर ‘सोसियल सर्कल’ ले अमेरिकी गृह मन्त्रालय र आइस विरुद्ध अदालतमा मुद्दा दायर गरेको छ। आफ्नो सानो क्षेत्रमा १० हजार आप्रवासीहरूलाई राख्ने गरी ठूलो थुना गृह खोल्ने संघीय सरकारको योजनाविरुद्ध उक्त समुदायले कानुनी उपचार खोजेको हो।
सहरका अधिकारीहरूद्वारा दायर गरिएको उक्त मुद्दामा आइसको यो नयाँ परियोजनाले स्थानीय पूर्वाधारमा अत्यधिक भार पार्ने उल्लेख गरिएको छ। जसका कारण सहरमा खानेपानीको हाहाकार हुने र ढल व्यवस्थापन अस्तव्यस्त भई मानव मलमूत्र सडकमै उम्लिने खतरा रहेको दाबी गरिएको छ। साथै, आइसले राज्य र संघीय कानुनको उल्लङ्घन गर्दै करदाताहरूको १२ करोड ८० लाख डलर खर्चेर उक्त विशाल गोदाम घर खरिद गरेको आरोप समेत लगाइएको छ।
मुद्धामा उल्लेख भएअनुसार, आइसका प्रतिनिधिहरूले सुरुमा उक्त केन्द्र जुन २०२६ सम्ममा सञ्चालनमा आउने बताएका थिए। तर, अहिलेसम्म गोदामलाई थुना गृहमा परिणत गर्ने कुनै पनि निर्माण कार्य सुरु भएको छैन। संघीय एजेन्सीले उक्त जग्गा खरिद गर्न सरकारी कोषबाट यसको वास्तविक मूल्याङ्कन गरिएको मूल्यभन्दा पाँच गुणा बढी रकम भुक्तानी गरेको पाइएको छ।
यस विषयमा प्रतिक्रिया दिँदै गृह मन्त्रालयका प्रवक्ताले हालै नयाँ गृहमन्त्रीका रूपमा नियुक्त भएका मार्कवेन मुलिनले एजेन्सीका पुराना नीति र प्रस्तावहरूको पुनरावलोकन गरिरहेको बताएका छन्। मुलिनले गत मार्चको अन्त्यमा क्रिस्ती नोएमलाई प्रतिस्थापन गरेका थिए। आफ्नो संसदीय सुनुवाइका क्रममा मन्त्री मुलिनले भनेका थिए, “म स्थानीय समुदायका नेताहरूसँग मिलेर काम गर्नेछु र राष्ट्रपतिले निर्धारण गर्नुभएको लक्ष्य अनुरूप डेलिभरी दिनेछु। हामी स्थानीय समुदायसँग असल साझेदार बन्न चाहन्छौँ।”
जर्जियाको वाल्टन काउन्टी अन्तर्गत पर्ने सोसियल सर्कल सहरका ७२ प्रतिशत मतदाताले गत निर्वाचनमा डोनाल्ड ट्रम्पलाई मतदान गरेका थिए। हालैका महिनाहरूमा मिनेसोटामा संघीय अध्यागमन अधिकारीहरूको गोली लागेर दुई अमेरिकी नागरिकको मृत्यु भएपछि ट्रम्प प्रशासनको आप्रवासन नीतिको तीव्र आलोचना भएको थियो। तर, अप्रिल महिनामा एनबीसी न्यूजले गरेको पछिल्लो मतसर्वेक्षण अनुसार, आप्रवासनको मुद्दामा ट्रम्पको अनुमोदन रेटिङमा पुनः सुधार आएको देखिन्छ।
अदालती कागजातहरूका अनुसार, जर्जियाको यो गोदाम घर आइसको देशव्यापी बृहत् योजनाको एक हिस्सा मात्र हो। आइसले देशभरी थप ९२ हजार ६ सय आप्रवासीहरूलाई राख्नका लागि ८ वटा ठूला डिटेन्सन सेन्टर, १६ वटा नयाँ प्रोसेसिङ सेन्टर र १० वटा तयारी अवस्थाका सुविधाहरू विकास गर्ने योजना बनाएको छ। यस योजनाको कुल लागत ३८.३ बिलियन डलर अनुमान गरिएको छ।
आइसले यी परिवर्तित गोदामहरू दीर्घकालीन हिरासत समाधानका रूपमा प्रयोग गरिने र त्यहाँ थुनुवाहरूलाई औसत ६० दिन मात्र राखिने स्पष्ट पारेको छ। अर्कोतर्फ, गृह मन्त्रालयका इन्स्पेक्टर जनरलले आइसद्वारा देशभर गरिएका यस्ता ‘मेगा-वेयरहाउस’ खरिद प्रक्रियाको अडिट सुरु गरेका छन्, जसले यो खरिद प्रक्रिया लागत-प्रभावी र नियमसङ्गत थियो वा थिएन भन्ने जाँच गर्नेछ।