प्रकाशित मिति : ९ असार २०८३, मंगलबार
Photo:Andy Feliciotti/ Unsplash
अमेरिकी तल्लो सदन ‘हाउस अफ रिप्रिजेन्टेटिभ्स’ले घरखरिदकर्ताहरूको लागत घटाउने र संस्थागत लगानीकर्ताहरूलाई नियन्त्रण गर्ने उद्देश्यले ल्याइएको एक किफायती आवास विधेयकको पक्षमा अत्यधिक बहुमतले मतदान गरेको छ। मंगलबार भएको मतदानमा विधेयकको पक्षमा ३५८ र विपक्षमा ३२ मत परेको थियो। यो विधेयक अब लालमोहरका लागि राष्ट्रपति डोनाल्ड ट्रम्पको टेबलमा पुगेको छ।
‘२१औँ शताब्दीको रोड टु हाउजिङ एक्ट’ नाम दिइएको यो कानुन तीव्र रूपमा विभाजित अमेरिकी संसद्मा एक दुर्लभ द्विपक्षीय सहमतिको उदाहरण बनेको छ। हप्तौँको बहस र दुवै सदनबीचको संशोधनसम्बन्धी मतभेदपछि गत हप्ता मात्रै सांसदहरूबीच अन्तिम सम्झौता भएको थियो। यसअघि सोमबार राति माथिल्लो सदन ‘सिनेट’ले ८५-५ को भारी बहुमतले यसलाई पारित गरेको थियो।
सभामुख माइक जोन्सनको कार्यालयका अनुसार राष्ट्रपति ट्रम्पले बुधबार सिनेटका रिपब्लिकन सांसदहरूसँगको पूर्वनिर्धारित बैठकअघि संसद् भवनमा यस विधेयकमा हस्ताक्षर गर्ने कार्यक्रम रहेको छ।
“यस ऐनको अन्तिम स्वीकृतिका साथ संसद्ले लामो समयदेखि आफ्नै घर पाउनबाट वञ्चित अमेरिकी परिवारहरूका लागि गृहस्वामित्वको मार्ग प्रशस्त गरेको छ,” मतदानपछि सभामुख जोन्सनले एक विज्ञप्तिमा भने। “यो रूपान्तरणकारी कानुनले आवासको किफायती समस्या समाधान गर्न, निर्माण व्यवसायीहरूका लागि नियमहरू खुकुलो पार्न, आवास बजारमा संस्थागत लगानी सीमित गर्न र लाखौँ युवा तथा श्रमजीवी परिवारका लागि ‘अमेरिकी सपना’ पुनः पहुँचभित्र ल्याउन मद्दत गर्नेछ।”
सन् २०२६ को मध्यावधि निर्वाचन नजिकिँदै गर्दा मतदातामाझ आवासको महँगी मुख्य मुद्दा बनेको छ। त्यसैले दुवै दल यस विधेयकको जस लिएर चुनावी मैदानमा जान उत्सुक छन्। रिपब्लिकनहरू हाल संसद्को दुवै सदनमा रहेको आफ्नो झिनो बहुमत जोगाउने प्रयासमा छन्। यो कानुनले नयाँ घर निर्माणका लागि कानुनी झन्झटहरू हटाउनेछ भने संस्थागत लगानीकर्ताहरूले किन्न पाउने एकल-परिवार घरको सङ्ख्या अधिकतम ३५० मा सीमित गर्नेछ।
तर, मंगलबार तल्लो सदनमा यो विधेयकले केही कडा दक्षिणपन्थी रिपब्लिकन सांसदहरूको विरोधको सामना गर्नुपर्यो। उनीहरूको असन्तुष्टि यो विधेयकमा विवादित निर्वाचन विधेयक ‘सेभ अमेरिका एक्ट’ समावेश नगरिएकोमा थियो, जसले मतदानका लागि परिचयपत्र र नागरिकताको प्रमाण अनिवार्य गर्न माग गर्दछ। राष्ट्रपति ट्रम्पले पनि यस मतदाता परिचयपत्र विधेयक पारित गर्न जोड दिँदै आउनुभएको छ, यद्यपि संसद्मा यसका लागि पर्याप्त मत छैन।
फ्लोरिडाकी रिपब्लिकन सांसद आना पावलिना लुनाले सामाजिक सञ्जाल एक्समा पोस्ट गर्दै नेतृत्वले दुई-तिहाइ बहुमत चाहिने ‘निलम्बन’ प्रक्रियामार्फत यसलाई छिटो पारित गर्न खोजे सदनको कामकारबाही अवरुद्ध गर्ने चेतावनी दिनुभएको थियो। यो ‘सेभ अमेरिका एक्ट’ गत फेब्रुअरीमा तल्लो सदनबाट पारित भए पनि सिनेटमा अड्किएको छ।