प्रकाशित मिति : २६ चैत्र २०८२, बिहिबार
वाशिंगटन, डी. सी. मा रहेको अमेरिकी विदेश मन्त्रालयको भवनको लबीको प्रवेशद्वार । (सेर्कन गुर्बुज/विदेश मन्त्रालय)
अमेरिकाले इराकमा रहेका अमेरिकी कूटनीतिक नियोग र कर्मचारीहरूमाथि भएका आक्रमणको निन्दा गरेको छ। अमेरिकी विदेश मन्त्रालयका उच्च अधिकारीले अमेरिकास्थित इराकका राजदूतलाई बोलाएर आक्रमणका घटनाप्रति खेद प्रकट गरेका हुन्।
इरान समर्थित मिलिसियाले इराकमा रहेका अमेरिकी कूटनीतिक स्थल र कर्मचारीहरूमाथि निरन्तर आक्रमण गर्दै आएका छन्।
उप-विदेशमन्त्री क्रिस्टोफर ल्यान्डाउले इराकका राजदूत निजार खिरुल्लाहसँगको भेटमा इराकी सुरक्षा बलले यी आक्रमणहरूको सामना गर्न गरेको प्रयासको भने प्रशंसा गरे।
तर, उनले इराक सरकार यस्ता आक्रमण रोक्न असफल भएको र सरकारसँग आबद्ध केही तत्वले मिलिसियालाई राजनीतिक, आर्थिक तथा सञ्चालन सहयोग प्रदान गरिरहेको आरोप लगाएका छन्। यस्तो सहयोगले अमेरिका–इराक सम्बन्धमा नकारात्मक असर पारिरहेको उनले उल्लेख गरे।
ल्यान्डाउले गम्भीर आतङ्कवादी आक्रमणहरूको कडा आलोचना गर्दै अप्रिल ८ मा बग्दादमा अमेरिकी कूटनीतिज्ञहरूमाथि भएको आक्रमणको पनि चर्चा गरे।
हालैका हप्ताहरूमा अमेरिकी नागरिक, कूटनीतिक नियोग, व्यावसायिक हितका साथै इराकका छिमेकी देशहरू, इराकी संस्थाहरू र सर्वसाधारणमाथि सयौँ आक्रमणहरू भएको जनाइएको छ। यी हमलाहरूमा इराकी कुर्दिस्तान क्षेत्र पनि समावेश छ।
उप-विदेशमन्त्रीले अमेरिका आफ्ना हितमाथि हुने आक्रमण सहन नगर्ने र इराक सरकारले तुरुन्त कदम चालेर इरानसँग सम्बन्धित मिलिसिया समूहहरू विघटन गर्नुपर्ने बताएका छन्।
बग्दादस्थित अमेरिकी दूतावासले सुरक्षा सूचना जारी गर्दै इरान समर्थित इराकी आतङ्कवादी मिलिसियाले कूटनीतिक सहयोग केन्द्र र बग्दाद अन्तर्राष्ट्रिय विमानस्थल नजिक ड्रोन आक्रमणहरू गरेको जनाएको छ।
इराकको हवाई क्षेत्रमा मिसाइल, ड्रोन र मोर्टारको जोखिम रहेकाले अमेरिकी नागरिकहरूलाई हवाई यात्रा नगर्न चेतावनी दिइएको छ।
अमेरिकी विदेश मन्त्रालयले इराकमा आफ्ना कूटनीतिक स्थलहरूमा भएका आक्रमणबारे जानकारी दिने व्यक्तिलाई ३० लाख डलरसम्म इनाम दिने घोषणा समेत गरेको छ।