प्रकाशित मिति : १६ चैत्र २०८२, सोमबार
अमेरिकी इमिग्रेशन एन्ड कस्टम्स इन्फोर्समेन्ट (आइस)को हिरासतमा एक मेक्सिकन आप्रवासीको मृत्यु भएको छ । मृत्यु हुनेमा मेक्सिकन आप्रवासी जोस ग्वाडालुपे रामोस रहेका छन् । उनको मार्च २५ मा लस एन्जलसको एडेलान्टो आइस प्रोसेसिङ्ग सेन्टरमा मृत्यु भएको आइसले सोमबार जानकारी दिएको हो ।
यससँगै २०२६ मा आइसको हिरासतमा मृत्यु हुनेहरूको संख्या १४ पुगेको छ।
आइसका अनुसार रामोसलाई सुरक्षा कर्मचारीहरूले उनको बंकमा बेहोस अवस्थामा फेला पारेका थिए। तत्कालै चिकित्सकीय टोली बोलाएर उनलाई नजिकको अस्पतालमा सारिएको थियो, जहाँ चिकित्सकले उनलाई मृत घोषणा गरे ।
रामोसलाई २३ फेब्रुअरीमा टोरान्स, क्यालिफोर्नियाबाट आइसले पक्राउ गरेको थियो। उनी २०२५ मा नियन्त्रित पदार्थको स्वामित्व र व्यक्तिगत सम्पत्ति चोरीको दोषी सावित भएका थिए। हिरासतमा लिइँदा प्रारम्भिक स्वास्थ्य जाँचले उनीमा डायबिटीज, उच्च कोलेस्ट्रोल र उच्च रक्तचाप रहेको पाइएको थियो।
ट्रम्प प्रशासनले पदभार ग्रहण गरेपछि एडेलान्तोमा मृत्यु भएका मध्ये रामोस चौथो बन्दी हुन् । यसअघि मृत्यु भएका तीन जना पनि मेक्सिकन पुरुष थिए।
आइसको हिरासतमा रहेका आप्रवासीको संख्या अभूतपूर्व स्तरमा पुगेको छ। प्रारम्भिक फेब्रुअरीसम्म ६८ हजार हिरासतमा थिए। आलोचकहरूले हिरासतलाई अत्यधिक दण्डात्मक र घातक हुन सक्ने बताए।
२०२५ मा आइसको हिरासतमा ३१ जनाको मृत्यु भएको थियो, जुन दुई दशकमा सबैभन्दा उच्च संख्या हो। हालको दरले यो रेकर्डलाई पार गर्न सक्ने जोखिम बढेको छ।
रिपब्लिकन समर्थन प्राप्त खर्च विधेयकले आइसलाई ठूलो बजेट वृद्धि प्रदान गरेको छ, जसले एजेन्सीलाई कुनै पनि समयमा एक लाखभन्दा बढी व्यक्तिलाई हिरासतमा राख्न अनुमति दिन्छ।