प्रकाशित मिति : २ जेष्ठ २०८३, शनिबार
अमेरिकाको न्यूयोर्कस्थित एक अदालतले चर्चित चलचित्र निर्माता हार्भे वाइनस्टिनविरुद्धको बलात्कार मुद्दामा निर्णायक मण्डल एकमत हुन नसकेपछि सुनुवाइलाई निष्कर्षविहीन अर्थात् “मिस्ट्रायल” घोषित गरेको छ।
निर्णायक मण्डलले निश्चित निर्णयमा पुग्न नसकेको जानकारी गराएपछि न्यायाधीशले उक्त आदेश दिएका हुन्। यो ७४ वर्षीय वाइनस्टिनविरुद्ध न्यूयोर्कमा चलाइएको तेस्रो सुनुवाइ हो। उनी अन्य अभियोगमा हाल पनि जेलमै सजाय काटिरहेका छन्।
करिब एक महिनासम्म चलेको यस सुनुवाइ मुख्य रूपमा वाइनस्टिनले एक दशकअघि अभिनेत्री बन्न प्रयासरत जेसिका म्यानमाथि गरेको भनिएको बलात्कारको आरोपमा केन्द्रित थियो। यसअघि सन् २०२० मा उनी यस मुद्दामा दोषी ठहर भएका थिए, तर उक्त फैसलालाई पछि उच्च अदालतले उल्ट्याइदिएको थियो। गत वर्ष भएको दोस्रो सुनुवाइ पनि निर्णायक मण्डलमा सहमति जुट्न नसक्दा निष्कर्षविहीन बनेको थियो।
सन् २०१७ को अक्टोबरदेखि यता विश्वभर चर्चित #मीटु अभियानका क्रममा दर्जनौँ महिलाले वाइनस्टिनमाथि यौन दुर्व्यवहार तथा बलात्कारको गम्भीर आरोप लगाएका छन्। वाइनस्टिनले भने आफू निरन्तर निर्दोष रहेको दाबी गर्दै आएका छन्।
म्यानह्याटनका जिल्ला सरकारी वकिल एल्भिन ब्रागले अभियोजन पक्षले अब चौथो पटक मुद्दा अघि बढाउने वा नबढाउने भन्नेबारे पीडितसँग परामर्श गरेर निर्णय लिने बताएका छन्। ब्रागले जेसिका म्यानले प्रदर्शन गरेको साहसको प्रशंसा गर्दै वाइनस्टिनविरुद्धको अर्को यौन दुर्व्यवहार मुद्दामा हुन बाँकी सजाय निर्धारणलाई ध्यानमा राख्दै आगामी कदम चालिने स्पष्ट पारे।
अर्कातर्फ, वाइनस्टिनका वकिलहरूले भने यो परिणामले समाजमा उनीविरुद्ध गहिरो पूर्वाग्रह रहेको पुष्टि गरेको दाबी गरेका छन्। उनीहरूले म्यानह्याटन जिल्ला सरकारी वकिलको कार्यालयलाई एउटै मुद्दा पटक-पटक दोहोर्याएर नचलाउन र न्यूयोर्कमा भइरहेका वास्तविक हिंसात्मक अपराध तथा सार्वजनिक सुरक्षाका विषयमा ध्यान केन्द्रित गर्न आग्रह गरेका छन्।
म्यानह्याटनको बहुसंख्यक पुरुष सदस्य रहेको निर्णायक मण्डलले तीन दिनसम्मको सघन छलफलपछि पनि कुनै निष्कर्ष निकाल्न नसकेको हो। सुनुवाइका क्रममा ह्विलचेयरमा रहेका वाइनस्टिनले अदालतको निर्णय सुन्दा कुनै प्रतिक्रिया जनाएनन्। अदालतका कर्मचारीले उनलाई ह्विलचेयरमै राखेर बाहिर लगेका थिए।
तीनवटै सुनुवाइमा आफ्नो बयान दिएकी जेसिका म्यानले भने यो निष्कर्षविहीन निर्णयले आफूले बोलेको सत्यलाई कमजोर नपार्ने र आफू न्यायका लागि लडिरहने बताएकी छन्। म्यानले विगतमा आफ्ना केही यौन सम्बन्धहरू आपसी सहमतिमा भएको स्वीकार गरे पनि मार्च २०१३ मा एक होटलको कोठामा आफूले पटक–पटक अस्वीकार गर्दागर्दै पनि वाइनस्टिनले जबरजस्ती करणी गरेको बयान दिएकी थिइन्।
वाइनस्टिन पक्षले भने उक्त सम्बन्ध पूर्ण रूपमा आपसी सहमतिमै भएको जिकिर गर्दै आएको छ। हालसम्म हलिउडका १०० भन्दा बढी महिलाले वाइनस्टिनमाथि यौन दुर्व्यवहार, यौन आक्रमण र बलात्कारको आरोप लगाइसकेका छन्।