प्रकाशित मिति : मंसिर १४, २०८१ शुक्रबार
अमेरिकी आप्रवासन नीतिहरूमा नयाँ प्रशासनसंगै महत्वपूर्ण रूपमा परिवर्तन हुनसक्ने भएकाले एचवान बी, एल वान लगायत अन्य रोजगारमा आधारित वा व्यापार भिषा धारकहरूलाई विदेश यात्रा गर्नु अघि समयमै भिषा स्ट्याम्पिङ गर्ने उपायमा सक्रिय कदम चाल्नका लागि विशेषज्ञहरूले सल्लाह दिएका छन्। ट्रम्प प्रशासन सुरु भएपछि अमेरिकी भिषा नीतिहरू अझ कडा हुने सम्भावना भएकाले यस्तो सुझाव दिइएको हो ।
अघिल्लो ट्रम्प प्रशासनको जस्तो कडा भिषा नियमहरूको पुनः कार्यान्वयनको सम्भावनालाई मध्यनजर गर्दै समयमै भिसा स्ट्याम्पिङ गर्नु महत्त्वपूर्ण भएको न्यूयोर्कका चर्चित कानुन व्यववसायी केशव राज सेडाईले बताएका छन् । २७ वर्ष भन्दा बढीको अनुभव भएका सेडाईले अमेरिकी आप्रवासन नीतिहरूको संभावित परिवर्तनको पृष्ठभूमिमा विदेशी नागरिकहरूको लागि समयमै भिसा स्ट्याम्पिङको महत्त्वमा जोड दिएका छन्।
ट्रम्प प्रशासनको समयमा अचानक यात्रा प्रतिबन्धहरू, लामो प्रशासनिक प्रक्रिया ढिलाइहरू र भिसा आवेदनहरूको बढी निरीक्षणले विदेशी नागरिकहरूका लागि महत्वपूर्ण चुनौतीहरू उत्पन्न गरेको थियो। धेरै व्यक्तिहरू अचानक नीतिगत परिवर्तन वा थप प्रक्रिया आवश्यकताका कारण अमेरिकामा फर्कन असमर्थ भएका थिए ।
रोजगारी र व्यक्तिगत योजनामा विघटन रोक्नका लागि आप्रवासीहरुलाई भिषा स्ट्याम्पिङको लागि योग्य भएपछि चाँडै आवेदन दिन सिफारिस गर्ने सेडाईले बताएका छन् । प्रारम्भिक कदमले कुनै प्रशासनिक ढिलाइहरूको सामना गर्ने पर्याप्त समय दिने र नीतिमा आकस्मिक परिवर्तनका जोखिमहरूलाई घटाउने उनले बताएका छन् ।
सेडाईले भनेका छन् -‘भिसा स्ट्याम्प पहिले नै सुरक्षित गर्नु तपाईंलाई अन्तर्राष्ट्रिय यात्रा गर्न अनुमति दिन्छ, जसले तपाईंको अध्यागमन स्टाटस वा रोजगारीलाई जोखिममा पार्दैन। तयारी र समयमै कदम चाल्नु अमेरिकी आप्रवासन कानूनी परिप्रेक्ष्यमा अनिश्चितताका बीचमा महत्त्वपूर्ण छ।’
अमेरिकी आप्रवासन नीतिको अनिश्चिततालाई ध्यानमा राख्दै विशेषज्ञहरूले भिसा धारकहरूको लागि सक्रिय र अग्रिम कदम चाल्नुलाई उनीहरूको यात्रा र अध्यागमन स्टाटस कायम राख्ने सबैभन्दा राम्रो उपायको रूपमा जोड दिएका छन्।
