प्रकाशित मिति : श्रावण १९, २०८२ सोमबार
अमेरिकामा इन्जिन फेल भएपछि विमानलाई आपतकालीन अवतरण गराइएको छ ।
वाशिङटन डल्लस इन्टरनेशनल एयरपोर्टबाट जर्मनीको म्युनिखतर्फ उडेको युनाइटेड एयरलाइन्सको विमान इन्जिन फेल भएपछि गत साता आपतकालीन अवतरण गर्न बाध्य भएको हो ।
२५ जुलाईमा युनाइटेड फ्लाइट १०८ उडेको थियो । उडानको केही मिनेटमै इन्जिनमा समस्या देखिएपछि डल्लास फर्किएको हो ।
विमान कम्पनीका अनुसार विमानमा २१९ यात्रु र ११ जना चालक दलका सदस्य सवार थिए।
बोइङ ७८७ विमान उडानपछि करिब ५ हजार फिट उचाइमा पुग्दा पाइलटले एयर ट्राफिक कन्ट्रोलसँग सम्पर्क गरेका थिए ।
उनले “इन्जिन फेल, बायाँ इन्जिन, युनाइटेड १०८ आपतकालीन स्थिति घोषणा गर्दैछ । “मेडे, मेडे, मेडे” पाइलटले भनेका थिए । मेडे भन्ने शब्द हवाइजहाजमा गम्भीर संकट वा आपतकालीन अवस्था सूचित गर्न प्रयोग गरिन्छ।
एयर ट्राफिक कन्ट्रोलरले पाइलटलाई सोधे, “के तपाईं अहिले दायाँ मोडिएर फिर्ता जान सक्नुहुन्छरु तपाईं र विमानस्थलको बीचमा अरू कुनै विमान छैन।”
उक्त विमान साँझ ८ बजे उडेपछि केही बेरमा घुमेर करिब ३० मिनेटपछि सुरक्षित रूपमा डल्लसमा अवतरण गरेको थियो।
अवतरणपछि विमानलाई एयरपोर्टको फायर एण्ड रेस्क्यु टिमले जाँच गरेपछि गेटसम्म तानेर लगिएको थियो । यस घटनाले अन्य उडानहरूमा कुनै असर नपरेको बताइएको छ।
युनाइटेड एयरलाइन्सले विमान सुरक्षित रूपमा अवतरण गरेको र सबै यात्रुहरू सामान्य रूपमा गेटमा झरेका बताएको छ । त्यसपछि सो उडान रद्द गरिएको थियो ।