प्रकाशित मिति : श्रावण १८, २०८२ आईतबार
यमनको तटमा करिब १५० जना बोकेको एक डुंगा डुब्दा ५० भन्दा बढी आप्रवासीको ज्यान गएको छ । खराब मौसमका कारण डुंगा डुब्दा यो घटना भएको अधिकारीहरुले बताएका छन ।
स्थानीय अधिकारीहरूका अनुसार डुंगा यमनको दक्षिणी प्रान्त अबयान नजिकै पल्टिएको थियो । घटनापछि केवल १० जनालाई मात्र उद्धार गरिएको छ । अझै धेरैजना बेपत्ता छन् ।
अन्तर्राष्ट्रिय आप्रवासन संगठन (आइओएम) का अनुसार धेरैजना मृतकहरू इथियोपियाली नागरिक भएको विश्वास गरिएको छ । यमन अफ्रिकाको होर्न क्षेत्रबाट खाडी राष्ट्रहरूमा काम खोज्न जाने आप्रवासीहरूका लागि मुख्य मार्ग हो ।
पछिल्ला केही महिनामा सयौं आप्रवासीहरू डुंगा दुर्घटनामा परेर मृत वा बेपत्ता भएका आइओएम ले जनाएको छ ।
आइओएम यमनका प्रमुख अब्दुसत्तोर एसोएभले बताएअनुसार अबयान प्रान्तको दक्षिणी खानफार क्षेत्रमा ५४ जना आप्रवासीको शव भेटिएको छ । १४ शव प्रान्तीय राजधानी जिन्जिबारको अस्पतालमा लगिएको छ।
आइओएम ले अफ्रिकाको होर्न क्षेत्रदेखि यमनसम्मको मार्गलाई “विश्वकै सबैभन्दा व्यस्त र जोखिमपूर्ण आप्रवासन मार्गहरूमध्ये एक” भनेको छ।
यसअघि मार्च महिनामा यमनको धुबाब जिल्लामा १८० भन्दा बढी आप्रवासी बोकेको दुई डुंगा डुबेको थियो । तीमध्ये दुई चालक मात्रै उद्धार गरिएको थियो । बाँकी सबै बेपत्ता र मृत आशंका गरिएको थियो।
आइओएमको रिपोर्टअनुसार यमनका आप्रवासी सहायता केन्द्रमा आएका व्यक्तिहरूले तस्करहरू अब झनै लापरवाहीपूर्वक खराब मौसममा डुंगा पठाउने गरेको बताएका छन् ।
जोखिमका बाबजुद, २०२४ मा मात्रै ६० हजार भन्दा बढी आप्रवासी यमन पुगेका छन्।
आइओएमका अनुसार गएको एक दशकमा सो मार्गमा ३ हजार ४०० भन्दा बढी आप्रवासीको मृत्यु भएको छ । जसमध्ये १ हजार ४०० भन्दा बढीको डुबेर मृत्यु भएको हो।