प्रकाशित मिति : असार १६, २०८२ सोमबार
अमेरिकी राष्ट्रपति डोनाल्ड ट्रम्पले आफ्नो दोस्रो कार्यकालमा ‘वन बिग ब्युटिफुल बिल एक्ट’ मार्फत आफ्नो राजनीतिक प्रभाव अझ बढाउने प्रयास गरिरहेका छन्।
यो विधेयक पारित भएमा आगामी जुलाई ४ को स्वतन्त्रता दिवसमा उनले विजयोत्सव मनाउन सक्ने सम्भावना छ। यो विधेयकले ट्रम्प प्रशासनको नीतिहरूलाई कानुनी रूप दिँदै दीर्घकालीन परिवर्तन ल्याउने लक्ष्य राखेको छ, जसअन्तर्गत कर कटौती र सामाजिक सुरक्षामा खर्च कटौती समावेश छन्।
यस विधेयकले उच्च आय भएका व्यक्तिहरूलाई ठूलो कर छुट दिने प्रस्ताव गरेको छ, जसलाई आलोचकहरूले ‘धनीहरूको विधेयक’ भनेका छन्।
मेडिकेडको खर्चको जिम्मेवारी राज्यहरूमा हस्तान्तरण गर्ने र लाभग्राहीका लागि काम गर्ने शर्तहरू राख्ने प्रस्ताव गरिएको छ। यसले खर्च नियन्त्रण हुने रिपब्लिकनहरूको दाबी छ, तर डेमोक्र्याटहरूले यसले लाखौं मानिसलाई स्वास्थ्य सेवाबाट वञ्चित गर्न सक्ने चेतावनी दिएका छन्।
अवैध आप्रवासी निष्कासनका लागि बजेट सुनिश्चित गर्नु र हरित ऊर्जा योजनामा कटौती पनि यस विधेयकका प्रमुख अंशहरू हुन्।
यस विधेयकलाई लिएर मिश्रित प्रतिक्रियाहरू आएका छन्। ट्रम्पका समर्थक रिपब्लिकनहरूले यसलाई ‘कार्यशील अमेरिकीहरूलाई राहत दिने’ र ‘राष्ट्रिय सुरक्षा बलियो बनाउने’ पहलका रूपमा व्याख्या गरेका छन्।
https://www.youtube.com/watch?v=videoseries
तर, आलोचकहरूले यो विधेयक धनी र निगमहरूलाई मात्र फाइदा पुग्ने बताउँदै आएका छन्।
सिनेटले विधेयकमा धेरै संशोधन गरेपछि यसलाई पुनः प्रतिनिधि सभामा पारित गर्नुपर्नेछ। ट्रम्पले जुलाई ४ लाई विधेयक पारित गर्ने अन्तिम मिति तोकेका छन्, तर कट्टरपन्थी रिपब्लिकन सांसदहरूको ऋण वृद्धिको चिन्ताका कारण समयसीमा चिप्लिन सक्ने सम्भावना पनि छ।
हालैका चारवटा प्रमुख सर्वेक्षणअनुसार यो विधेयक अमेरिकी जनतामाझ निकै अलोकप्रिय छ। औसतमा ५५ प्रतिशत जनताले यसलाई अस्वीकार गरेका छन् भने केवल ३१ प्रतिशतले मात्र समर्थन गरेका छन्। यसको प्रत्यक्ष असर सन् २०२६ को मध्यावधि निर्वाचनमा देखिन सक्ने अनुमान गरिएको छ।
यदि ट्रम्प यो विधेयक पारित गराउन सफल भएमा उनको राजनीतिक साख थप बलियो हुनेछ। यद्यपि, विश्लेषकहरूले यो विधेयक भविष्यमा रिपब्लिकन पार्टीका लागि राजनीतिक बोझ बन्न सक्ने सम्भावना पनि औंल्याएका छन्।
तत्कालको राजनीतिक लाभ र दीर्घकालीन असरबीचको यो द्वन्द्वले ट्रम्पको दोस्रो कार्यकालको परिभाषा तय गर्न सक्ने बताइएको छ।