प्रकाशित मिति : फाल्गुन १४, २०८१ बुधबार
सुडानमा सैनिक विमान दुर्घटनाहुँदा कम्तीमा ४६ जनाको मृत्यु भएको छ । सुडानको खार्तुमको बाहिरी इलाकामा रहेको आवासीय क्षेत्रमा दुर्घटना भएको हो ।
सैन्य यातायातको विमान दुर्घटना हुँदा कम्तीमा ४६ जनाको मृत्यु भएको र कम्तीमा १० जना घाइते भएको जनाइएको छ ।
सेनासम्बद्ध स्वास्थ्य मन्त्रालयले विमानमा सवार १९ जनाको मृत्यु भएको पुष्टि गरेको छ ।
राजधानीको उत्तरपश्चिममा रहेको ओमदुरमानमा रहेको सेनाको सबैभन्दा ठूलो सैन्य केन्द्र वादी सेडना एयर बेस नजिकै मङ्गलबार राति एन्टोनोभ विमान दुर्घटनाग्रस्त भएको थियो ।
प्रत्यक्षदर्शीहरूले ठूलो विस्फोटको आवाज सुनेको र त्यस क्षेत्रमा थुप्रै घरहरू क्षतिग्रस्त भएको देखेको बताएका छन्। विमानमा प्रविधिक खराबीका कारण दुर्घटना भएको प्रारम्भिक जानकारी पाइएको बताइएको छ ।
सेना प्रमुख अब्देल फतह अल बुरहान र आरएसएफका पूर्व डेपुटी कमाण्डर मोहम्मद हमादान डग्लोबीच करिब दुई वर्ष लामो द्वन्द्वमा यी घटनाले तीव्रता पाएका छन् ।
संयुक्त राष्ट्रसंघले सुडानमा दशौं हजार मानिसको ज्यान गएको बताएको छ । यस लडाईंले खार्तूम र अन्य प्रमुख शहरहरू तहसनहस पारेको छ । लाखौँ मानिसहरू विस्थापित भएका छन् ।
महत्त्वपूर्ण पूर्वाधारहरू क्षतिग्रस्त भएका छन् । मध्य सुडान र राजधानीमा हालै सेनाले नियन्त्रण लिने प्रयासमा प्रगति भएको तर द्वन्द्व समाधानको कुनै सङ्केत देखिएको छैन।
