प्रकाशित मिति : फाल्गुन ७, २०८१ बुधबार
अमेरिकी राष्ट्रपति डोनाल्ड ट्रम्पले अर्बपति एलन मस्कलाई अन्तरिक्ष सम्बन्धी कुनै पनि सरकारी निर्णयहरूमा सहभागी हुन नदिने बताएका छन् ।
मंगलबार पत्रकारहरूसँग कुरा गर्दै ट्रम्पले मस्कका सम्भावित स्वार्थको द्वन्द्वबारे उठेका प्रश्नहरूको जवाफ दिँदै भने, “अन्तरिक्षसँग सम्बन्धित कुनै पनि विषयमा हामी एलन मस्कलाई सहभागी गराउने छैनौँ ।”
यसअघि ह्वाइट हाउसले मस्कले आफ्ना विभिन्न व्यावसायिक चासोहरू र सङ्घीय सरकारको खर्च कटौती गर्ने उनको प्रयासबिच कुनै द्वन्द्व उत्पन्न भएमा आफूलाई अलग गर्ने प्रतिबद्धता जनाएको बताएको थियो ।
ह्वाइट हाउसका अनुसार मस्क हाल राष्ट्रपतिको वरिष्ठ सल्लाहकारको रूपमा कार्यरत छन्, तर उनी सरकारको सरकारी दक्षता विभाग (डिओजीई) को कर्मचारी भने होइनन्। ह्वाइट हाउसले मस्कसँग सरकारी निर्णयहरूमा कुनै प्रत्यक्ष अधिकार नरहेको स्पष्ट पारेको छ ।
राष्ट्रपति ट्रम्पले आफ्नो दोस्रो कार्यकालको सुरुवातसँगै सङ्घीय सरकारको खर्च कटौतीका लागि व्यापक सुधार सुरु गरेका छन्। उनले मस्कलाई सरकारी दक्षता विभागको प्रमुखको रूपमा नियुक्त गर्दै अनावश्यक खर्च नियन्त्रण गर्न जिम्मेवारी दिएका छन्। यो सुधार अभियानअन्तर्गत हजारौँ सङ्घीय कर्मचारीहरूको रोजगारी कटौती भइसकेको छ।
राष्ट्रपति ट्रम्पले मस्कको राष्ट्रभक्ति प्रति विश्वास व्यक्त गर्दै भने, “एलन मेरो लागि एक देशभक्त हुन्। तपाईँ उनलाई कर्मचारी भन्न सक्नुहुन्छ, सल्लाहकार भन्न सक्नुहुन्छ, जुनसुकै भन्न सक्नुहुन्छ, तर उनी देशभक्त हुन्।”