प्रकाशित मिति : २४ असार २०८३, बुधबार
फोटो: जेरेमी डोरोघ
अमेरिकी विदेश मन्त्रालयले अमेरिकी नागरिकहरूलाई आफ्नै फोन वा कम्प्युटरबाट खिचिएका पासपोर्ट आवेदनका फोटोहरू अपलोड गर्न दिने तयारी गरिरहेको छ। यो परिवर्तनसँगै फोटो खिच्नका लागि फर्मेसी वा फोटो स्टुडियो नै जानुपर्ने दशकौँ पुरानो बाध्यताको अन्त्य हुनेछ।
विदेश मन्त्री मार्को रुबियोका अनुसार यो परिवर्तन राहदानी आवेदन प्रणालीलाई आधुनिक बनाउने र पर्खनुपर्ने समय, अपोइन्टमेन्ट तथा धेरै संख्यामा भौतिक फोटोहरू प्रिन्ट गरेर बुझाउनुपर्ने झन्झटलाई कम गर्ने बृहत्तर प्रयासको एक हिस्सा हो।
अमेरिकाको २५०औँ वार्षिकोत्सवको अवसरमा पुन: डिजाइन गरिएको “पेट्रियट पासपोर्ट” सार्वजनिक गर्न आयोजित एक समारोहमा बोल्दै रुबियोले भने, “तपाईं कतै जानुको साटो आफ्नै उपकरण ल्यापटप वा कम्प्युटरबाट फोटो खिच्न सक्षम हुनुपर्छ। तपाईंले त्यस उपकरणबाट फोटो खिच्न सक्नुहुनेछ र हाम्रो सुरक्षा प्रणालीमार्फत वास्तविक समयमै त्यसको फेसियल आईडी प्रमाणित हुनेछ।”
प्रस्तावित प्रणाली अन्तर्गत आवेदकहरूले पासपोर्टआवेदनको अधिकांश भाग अनलाइनमार्फत नै पूरा गर्नेछन् र मन्त्रालयको मापदण्ड साइज, लाइटिङ र ब्याकग्राउन्ड मिल्ने गरी फोटो खिच्न आफ्नै उपकरणको इन-बिल्ट क्यामेरा प्रयोग गर्नेछन्। उक्त फोटोलाई एउटा सुरक्षित पोर्टल मार्फत बुझाइनेछ, जहाँ स्वचालित प्रविधिले त्यसको जाँच गर्नेछ र कुनै समस्या भएमा तुरुन्तै सङ्केत गर्नेछ ताकि आवेदकले फेरि फोटो खिच्न सकून्।
फोटो अपलोड गर्ने यो सुविधा अहिले नै पूर्ण रूपमा सञ्चालनमा आइसकेको भने छैन। विदेश मन्त्री रुबियोले आफ्नै फोटो खिच्ने सुविधासहितको यो पूर्ण अनलाइन प्रणाली तयार हुनसाथ “अबको केही महिनामा” सुरु गरिने बताए।
यो कदमले फर्मेसी, ड्रगस्टोर जस्तै सीभीएस वा वालग्रीन्सवा फोटोग्राफी स्टुडियोमा गएर तोकिएको मापदण्डको फोटो खिचाउनुपर्ने लामो समयदेखिको प्रक्रियामा ठूलो परिवर्तन ल्याउनेछ। व्यक्तिगत उपकरणबाटै फोटो अपलोड गर्न दिएर विदेश मन्त्रालयले आवेदकहरूको यात्रा र समयको खर्च घटाउने, ग्रामीण क्षेत्रका मानिसहरूका लागि सहजता बढाउने र म्यानुअल रूपमा फोटो जाँच गर्ने झन्झट हटाई प्रक्रियालाई तीव्र बनाउने लक्ष्य राखेको छ।
रुबियोले परम्परागत तरिका नै मन पराउने आवेदकहरूका लागि उक्त विकल्प कायमै रहने कुरामा जोड दिए, तर यो अनलाइन प्रणाली पूर्ण रूपमा सुरु भएपछि धेरैजसो नयाँ राहदानी आवेदनका लागि अनलाइनबाटै आफैँ फोटो खिच्ने विकल्प नै प्राथमिक माध्यम बन्नेछ।