प्रकाशित मिति : १० चैत्र २०८२, मंगलबार
क्यानाडा सरकारले आफ्नो आप्रवासन प्रणालीलाई व्यवस्थित र दिगो बनाउन आगामी २०२६/२०२७ का लागि नयाँ योजना सार्वजनिक गरेको छ। क्यानाडाको अध्यागमन, शरणार्थी र नागरिकता मन्त्रालयले आवास, पूर्वाधार र सामाजिक सेवामा परेको चापलाई कम गर्न विदेशी कामदार र अन्तर्राष्ट्रिय विद्यार्थीहरूको संख्यामा भारी कटौती गर्ने घोषणा गरेको हो।
सन् २०२५ मा ६,७३,६५० रहेको अस्थायी बासिन्दाको लक्ष्यलाई सन् २०२६ सम्ममा ३,८५,००० मा झारिनेछ। सन् २०२७ को अन्त्यसम्ममा कुल जनसंख्यामा अस्थायी बासिन्दाको हिस्सा ५% भन्दा कम राख्ने सरकारको लक्ष्य छ।२०२६ का लागि स्थायी बासिन्दाको लक्ष्य ३,८०,००० मा स्थिर राखिएको छ। यद्यपि, आर्थिक आप्रवासीहरूको हिस्सा ५९% बाट बढाएर ६४% पुर्याइनेछ।
सरकारले स्वास्थ्य सेवा, निर्माण र उदीयमान प्रविधि क्षेत्रका दक्ष कामदारहरूलाई भने आकर्षण गरिरहने जनाएको छ। क्युबेक बाहिर फ्रेन्च भाषी आप्रवासीहरूको संख्या २०२६ मा ९% पुर्याउने र २०२९ सम्म १२% पुर्याउने लक्ष्य छ। साथै, शरणार्थी दाबी प्रक्रियालाई थप कडा र प्रभावकारी बनाइने मन्त्री लेना मेटलेज डियाबले बताउनुभयो।
क्यानाडाको अर्थतन्त्र दक्ष जनशक्तिमा निर्भर रहे पनि हालको स्रोत र साधनको उपलब्धतालाई ध्यानमा राख्दै यो “संतुलित कदम” चालिएको सरकारको दाबी छ।