प्रकाशित मिति : २९ फाल्गुन २०८२, शुक्रबार
फोटो : एपी/रासस
अमेरिकाले मध्यपूर्व क्षेत्रमा आफ्नो सैन्य उपस्थिति अझ बढी सशक्त बनाउने तयारी गरेको छ। दुई अमेरिकी अधिकारीहरूका अनुसार, अमेरिकाले ‘एम्फिबियस रेडी ग्रुप’ र त्यससँग सम्बन्धित ‘मरीन एक्स्पेडिशनरी युनिट’ लाई मध्यपूर्वतर्फ पठाउने योजना बनाएको हो।
यस समूहको नेतृत्व जापानमा तैनाथ रहेको युएसएस ट्रिपोली नामक एम्फिबियस असल्ट जहाजले गर्नेछ। युएसएस ट्रिपोलीको नेतृत्वमा रहने यस्तो सैन्य समूहमा सामान्यतया विभिन्न युद्धपोतहरूसहित करिब ५,००० नौसैनिक र मरीन कमाण्डोहरू तैनाथ हुने गर्छन्।
यसैबीच, अमेरिकी राष्ट्रपति डोनल्ड ट्रम्पले स्ट्रेट अफ होर्मुज नजिकै रहेको इरानको खार्ग द्वीपस्थित सैन्य पूर्वाधारहरू पूर्ण रूपमा ध्वस्त पारेको दाबी गरेका छन्। खार्ग द्वीप विश्वव्यापी तेल ढुवानीका लागि रणनीतिक रूपमा अत्यन्त महत्त्वपूर्ण मानिने स्ट्रेट अफ होर्मुज क्षेत्रमा पर्दछ।
इरानले जवाफी कारबाहीस्वरूप इजरायल र मध्यपूर्वमा रहेका अमेरिकी सैन्य अड्डाहरूलाई लक्षित गरी आक्रमण गरेपछि अन्तर्राष्ट्रिय हवाई यात्राका प्रमुख केन्द्रहरू प्रभावित भएका छन् भने विश्व बजारमा तेलको मूल्य पनि उल्लेख्य रूपमा बढेको छ। राष्ट्रपति ट्रम्पले स्ट्रेट अफ होर्मुज हुँदै जाने तेल ट्यांकरहरूलाई अमेरिकी नौसेनाले चाँडै सुरक्षा प्रदान गर्ने बताएका छन्।
मध्यपूर्व क्षेत्र हेर्ने अमेरिकी सैन्य कमान्डको मागबमोजिम रक्षा मन्त्री पेट हेगसेथले थप सैन्य परिचालनको प्रस्ताव स्वीकृत गरेका हुन्। यसैगरी, अमेरिकाले दक्षिण कोरियामा तैनाथ रहेको मिसाइल प्रतिरक्षा प्रणालीका केही भागहरू पनि मध्यपूर्वतर्फ सारिरहेको जानकारी दिइएको छ।
ट्रम्पले यसअघि नै इरानमाथि आगामी साताभित्र “कडा प्रहार” गरिने चेतावनी दिँदै इरानसँगको युद्ध “आफूलाई अन्त्य भएको अनुभूति भएपछि मात्र समाप्त हुने” बताएका छन्। रक्षा मन्त्री हेगसेथले पनि अमेरिकी सेनाले “शत्रुप्रति कुनै दया नदेखाउने” चेतावनी दिएका छन्।
पेन्टागनका अनुसार, फेब्रुअरी २८ मा अमेरिका र इजरायलले इरानमाथि हमला सुरु गरेपछिको दुई सातामा अमेरिकाले इरानका ६,००० भन्दा बढी लक्ष्यहरूमा आक्रमण गरिसकेको छ। उक्त प्रारम्भिक आक्रमणमा इरानका सर्वोच्च नेता अली खामेनी लगायतका उच्च पदस्थ अधिकारीहरू मारिएको दाबी गरिएको छ।