विश्व सुरक्षा चुनौतीविरुद्ध एकजुट हुन राष्ट्रसंघको मञ्चबाट नेपाल प्रहरी प्रमुख कार्कीको आह्वान

नेपालका प्रहरी प्रमुखले विश्वव्यापी रूपमा जटिल र सीमापार फैलिएका सुरक्षा चुनौतीहरू सामना गर्न सशक्त अन्तर्राष्ट्रिय सहकार्य आवश्यक रहेको औंल्याउँदै संयुक्त राष्ट्रसंघीय शान्ति मिसनप्रति नेपालको दीर्घकालीन प्रतिबद्धता व्यक्त गरेका छन्।

न्यूयोर्कस्थित संयुक्त राष्ट्रसंघ मुख्यालयमा जुलाई ८ मा आयोजित पाँचौं संयुक्त राष्ट्रसंघीय प्रहरी प्रमुखहरूको सम्मेलनलाई सम्बोधन गर्दै प्रहरी महानिरीक्षक दानबहादुर कार्कीले आतंकवाद, अन्तर्राष्ट्रिय संगठित अपराध, साइबर अपराध, गलत तथा भ्रामक सूचना, अवैध वित्तीय प्रवाह तथा जलवायुजन्य असुरक्षाजस्ता चुनौतीहरू थप जटिल बन्दै गएको र सीमाभन्दा बाहिर फैलिएको बताएका हुन्।

जुलाई ७ देखि ८ सम्म आयोजित उक्त सम्मेलनमा मन्त्रीहरू, प्रहरी प्रमुखहरू तथा क्षेत्रीय र व्यावसायिक प्रहरी संगठनका वरिष्ठ प्रतिनिधिहरू सहभागी भई राष्ट्रिय तथा संयुक्त राष्ट्रसंघीय प्रहरी संयन्त्रको एकीकृत शक्ति र भूमिकामार्फत विश्व शान्ति, सुरक्षा र विकास सुदृढ गर्ने विषयमा छलफल गरिएको थियो। कार्यक्रममा सहभागी नेपाली प्रतिनिधिमण्डलमा सशस्त्र प्रहरी बल नेपालका प्रमुख नारायण दत्त पौडेल पनि सहभागी थिए।

विश्वव्यापी सुरक्षा चुनौतीहरू झन् जटिल बन्दै गएको अवस्थामा सम्मेलन आयोजना गरिएको उल्लेख गर्दै कार्कीले यस्ता सीमापार चुनौतीहरूको सामना गर्न बलियो अन्तर्राष्ट्रिय सहकार्य अपरिहार्य रहेको बताए। उनले नागरिक सुरक्षाको संरक्षण, विधिको शासन प्रवर्द्धन तथा दिगो शान्ति कायम गर्न संयुक्त राष्ट्रसंघको भूमिका “पहिलेभन्दा अझ महत्वपूर्ण” रहेको उल्लेख गरे।

कार्कीले संयुक्त राष्ट्रसंघीय शान्ति मिसनमा नेपालको निरन्तर योगदानको चर्चा गर्दै हालसम्म नेपालले विश्वका विभिन्न मिसनहरूमा १७ हजार ८५२ प्रहरी कर्मचारी खटाइसकेको जानकारी दिए। “नेपाल संयुक्त राष्ट्रसंघीय शान्ति मिसनमा दृढ र गौरवपूर्ण योगदानकर्ता राष्ट्र हो,” उनले भने, “यो हाम्रो अन्तर्राष्ट्रिय शान्ति र सुरक्षाप्रतिको अटल प्रतिबद्धताको प्रतिबिम्ब हो।”

उनले नेपाल प्रहरीले व्यावसायिकता, निष्ठा र आचरणको उच्चतम मापदण्ड कायम राख्दै विशेषगरी महिला र बालबालिकासहितका नागरिकहरूको संरक्षणलाई केन्द्रमा राखेर कार्य गरिरहेको बताए। साथै, सबै तहमा जवाफदेहिता सुदृढ गर्ने प्रयास भइरहेको पनि उल्लेख गरे।

कार्कीले संयुक्त राष्ट्रसंघीय मिसनहरूमा विशेषीकृत प्रहरी क्षमताको प्रयोग विस्तार गर्न, जसमा गठनबद्ध प्रहरी इकाइ र व्यक्तिगत प्रहरी अधिकृतहरू समावेश छन्, नेपालको समर्थन रहेको जनाए। साथै क्षमता अभिवृद्धि, ज्ञान अभिवृद्धि, ज्ञान आदान–प्रदान र कार्यसम्पादन प्रभावकारिता बढाउन बलियो साझेदारी आवश्यक रहेकोमा जोड दिए।

“शान्ति मिसनहरू परिवर्तन हुँदै गइरहेका बेला संयुक्त राष्ट्रसंघीय प्रहरी लचिलो, व्यावसायिक, जनमुखी, प्रविधिमैत्री र उदीयमान सुरक्षा चुनौतीहरू सामना गर्न सक्षम हुनुपर्छ,” उनले भने।

उनले संयुक्त राष्ट्रसंघीय प्रहरीको भविष्य केवल संकट व्यवस्थापनमा सीमित नभई द्वन्द्व रोकथाम, विधिको शासन सुदृढीकरण, नागरिक संरक्षण र सक्षम राष्ट्रिय संस्थाहरूको समर्थनमा केन्द्रित हुनुपर्ने बताए। कार्कीले दिगो शान्ति र सुरक्षा प्रवर्द्धनका लागि मानव अधिकार, समुदाय–मुखी प्रहरी व्यवस्था, समावेशी नेतृत्व र अर्थपूर्ण साझेदारीलाई निरन्तर प्राथमिकता दिनुपर्नेमा जोड दिए।

उनले वर्तमान चुनौतीहरूको सामना गर्न बलियो बहुपक्षीयता, नवप्रवर्तन र सामूहिक प्रयास आवश्यक रहेको उल्लेख गरे। “व्यावसायिकता र साझेदारीको मार्गदर्शनमा हामी सबैले मिलेर शान्ति, सुरक्षा र विधिको शासन प्रवर्द्धन गर्न निरन्तर काम गर्नुपर्छ,” कार्कीले भने। उनले नेपालको तर्फबाट योगदान जारी रहने प्रतिबद्धता जनाउँदै भने, “नेपाल आफ्नो भूमिका निर्वाह गर्न सदैव तयार छ।”

कार्कीको मन्तव्यको पूर्ण पाठ (अनौपचारिक अनुवाद)

“महामहिमहरू, मन्त्रीगण, संयुक्त राष्ट्र संघका उप-महासचिव, विशिष्ट प्रतिनिधिहरू, भद्रभलाद्मी तथा दिदीबहिनीहरू, वैश्विक सुरक्षाका चुनौतीहरू दिनानुदिन जटिल बन्दै गइरहेको यस घडीमा आयोजना गरिएको यस महत्त्वपूर्ण शिखर सम्मेलनमा सहभागी हुन पाउनु मेरो लागि ठूलो सम्मान र सौभाग्यको कुरा हो।

आतंकवाद, अन्तरदेशीय संगठित अपराध, साइबर अपराध, भ्रामक तथा गलत सूचना, अवैध वित्तीय प्रवाह, र जलवायु परिवर्तनजन्य असुरक्षाले सीमानाहरू नाघिसकेका छन् र यसका लागि अझ बलियो अन्तर्राष्ट्रिय सहयोग आवश्यक छ। यस सन्दर्भमा, नागरिकको रक्षा गर्न, विधिको शासनलाई प्रवर्द्धन गर्न र शान्ति कायम राख्न संयुक्त राष्ट्र संघको भूमिका पहिलेभन्दा अझ बढी महत्त्वपूर्ण भएको छ।

नेपाल संयुक्त राष्ट्र संघको शान्ति स्थापना कार्यमा एक अटल र गौरवशाली योगदानकर्ताको रूपमा रहँदै आएको छ। अन्तर्राष्ट्रिय शान्ति र सुरक्षाप्रतिको हाम्रो अटुट प्रतिबद्धतालाई झल्काउँदै नेपालले हालसम्म विश्वभरका संयुक्त राष्ट्र संघका मिसनहरूमा १७,८५२ प्रहरी कर्मचारी परिचालन गरिसकेको छ।

हामी व्यावसायिकता, इमानदारिता र आचरणको उच्च मापदण्डप्रति प्रतिबद्ध छौं। नागरिक, विशेष गरी महिला र बालबालिकाको संरक्षण हाम्रो शान्ति स्थापनाको प्रयासको केन्द्रविन्दुमा रहेको छ र हामी सबै तहमा जवाफदेहितालाई सुदृढ गर्दै लैजानेछौं। नेपालले गृह प्रहरी एकाइ (FPU) र व्यक्तिगत प्रहरी अधिकारी (IPO) लगायतका विशिष्टीकृत प्रहरी क्षमताहरूको बढीभन्दा बढी उपयोगलाई समर्थन गर्दछ। हामी क्षमता अभिवृद्धि, ज्ञान आदानप्रदान र परिचालन प्रभावकारिता अभिवृद्धिमा सुदृढ साझेदारीलाई पनि उत्तिकै महत्त्व दिन्छौं।

महामहिमहरू, शान्ति स्थापनाका कार्यहरू विकसित हुँदै जाँदा, संयुक्त राष्ट्र संघीय प्रहरी अनुकूलन योग्य, व्यावसायिक, जनमुखी, प्राविधिक रूपमा सक्षम र उदीयमान सुरक्षा चुनौतीहरूको सामना गर्न तयार हुनुपर्छ। संयुक्त राष्ट्र संघीय प्रहरीको भविष्य संकटको सामना गर्ने मात्र नभई द्वन्द्व रोकथाम गर्ने, विधिको शासनलाई सुदृढ गर्ने, नागरिकको रक्षा गर्ने र लचिलो राष्ट्रिय निकायहरूलाई सहयोग गर्ने कार्यमा निहित छ। दिगो शान्ति र सुरक्षालाई अगाडि बढाउन संयुक्त राष्ट्र संघीय प्रहरीले मानव अधिकार, समुदायमुखी प्रहरी सेवा, समावेशी नेतृत्व र अर्थपूर्ण साझेदारीलाई निरन्तरता दिनुपर्छ।

अन्तमा महामहिमहरू, आजका चुनौतीहरूले अझ बलियो बहुपक्षीयता, नवप्रवर्तन र सामूहिक प्रयासको माग गर्दछन्। व्यावसायिकता र साझेदारीद्वारा निर्देशित हुँदै, हामीले सबैका लागि शान्ति, सुरक्षा र विधिको शासन प्रवर्द्धन गर्न सँगै मिलेर काम गर्नुपर्छ। नेपाल आफ्नो भूमिका निर्वाह गर्न सधैं तयार छ। धन्यवाद। जय नेपाल।”