प्रकाशित मिति : २१ चैत्र २०८२, शनिबार
अमेरिकाको न्यूयोर्कस्थित सेन्ट्रल पार्कमा चेरी फूल हेर्दै मानिसहरू। तस्वीर : झाङ फेङगुओ/सिन्ह्वा-रासस
अमेरिकी श्रम बजारमा मार्च महिनामा उल्लेख्य सुधार देखिएको छ। अमेरिकी डिपार्टमेन्ट अफ लेबरअन्तर्गतको ब्युरो अफ लेबर स्ट्याटिस्टिक्सले सार्वजनिक गरेको पछिल्लो तथ्याङ्क अनुसार गत मार्च महिनामा १ लाख ७८ हजार नयाँ रोजगारीका अवसरहरू थपिएका छन्। फेब्रुअरी महिनामा १ लाख ३३ हजारले रोजगारी गुमेको अवस्थालाई उल्ट्याउँदै मार्चमा भएको यो वृद्धिले अमेरिकी अर्थतन्त्रमा उत्साह भरेको छ। रोजगारी थपिए पनि बेरोजगारी दरमा भने खासै फेरबदल आएको छैन, जुन अहिले ४ दशमलव ३ प्रतिशतमा स्थिर रहेको छ।
मार्च महिनामा विशेष गरी स्वास्थ्य सेवा, निर्माण, र यातायात तथा भण्डारण क्षेत्रमा व्यापक रोजगारीका अवसरहरू सिर्जना भएका छन्। स्वास्थ्य सेवा क्षेत्रले मात्रै ७६ हजार नयाँ कर्मचारी थपेको छ, जसमा चिकित्सकका कार्यालयहरूमा फर्किएका कामदारहरूको ठुलो हिस्सा रहेको छ। त्यस्तै, निर्माण क्षेत्रमा २६ हजार र यातायात क्षेत्रमा २१ हजार रोजगारी थपिएको छ। यद्यपि, सङ्घीय सरकार अन्तर्गतको रोजगारी भने अझै घट्दो क्रममा छ। अक्टोबर २०२४ को तुलनामा सङ्घीय रोजगारीमा करिब साढे ३ लाख भन्दा बढीको गिरावट आइसकेको छ।
तथ्याङ्क अनुसार विभिन्न समुदायको बेरोजगारी अवस्था पनि फरक–फरक देखिएको छ। एसियाली मूलका मानिसहरूको बेरोजगारी दर घटेर ३ दशमलव ७ प्रतिशतमा पुगेको छ भने गोरा जातिको ३ दशमलव ६ प्रतिशत, हिस्पानिकको ४ दशमलव ८ प्रतिशत र अश्वेत जातिको ७ दशमलव १ प्रतिशत बेरोजगारी दर कायम छ। यस्तै, लामो समयदेखि (२७ हप्ता वा सोभन्दा बढी) बेरोजगार रहेकाहरूको सङ्ख्या १८ लाख पुगेको छ, जुन गत वर्षको तुलनामा ३ लाख २२ हजारले बढी हो। यो तथ्याङ्कले पूर्णकालीन काम खोजिरहेका तर नपाएर आंशिक काममा चित्त बुझाउन बाध्य भएका ४५ लाख अमेरिकीहरूको अवस्थालाई पनि प्रतिबिम्बित गर्दछ।
आर्थिक दृष्टिकोणले श्रमिकहरूको ज्यालामा भने सामान्य वृद्धि भएको छ। मार्चमा निजी क्षेत्रका कर्मचारीहरूको औसत प्रतिघण्टा आम्दानी ९ सेन्टले बढेर ३७ डलर ३८ सेन्ट पुगेको छ। यो गत वर्षको तुलनामा ३ दशमलव ५ प्रतिशतको वृद्धि हो। यस्तै, श्रमिकहरूको औसत कार्य समय प्रति हप्ता ३४ दशमलव २ घण्टा कायम भएको छ। यसअघि सार्वजनिक गरिएको जनवरी र फेब्रुअरीको रोजगारी विवरणलाई पनि परिमार्जन गरिएको छ, जसअनुसार दुई महिनाको एकीकृत तथ्याङ्क पहिले अनुमान गरिएभन्दा ७ हजारले कम देखिएको छ।