प्रकाशित मिति : ११ असार २०८३, बिहिबार
अमेरिकाको डिपार्टमेन्ट अफ होमल्याण्ड सेक्युरिटीको निगरानी निकायले आइसको हिरासतमा रहेका आप्रवासीहरूको व्यवस्थापनलाई लिएर दुईवटा नयाँ छानबिन सुरु गरेको छ।
इन्स्पेक्टर जनरलको वेबसाइटमा सार्वजनिक गरिएको जानकारी अनुसार, एउटा छानबिन हिरासतमा रहेका आप्रवासीहरूको मृत्युमा भएको वृद्धिको विषयमा केन्द्रित हुनेछ भने अर्को छानबिनले हिरासत केन्द्रहरूमा बल प्रयोगको उचित मापदण्ड पालना भए/नभएको जाँच गर्नेछ।
यो कदम हालैका वर्षहरूमा हिरासतमा आप्रवासीहरूको मृत्यु बढेपछि चालिएको हो। यसै वर्ष टेक्सासको एल पासोस्थित ‘क्याम्प इस्ट मोन्टाना’ मा एक जना थुनुवाको मृत्यु भएको थियो, जसलाई चिकित्सा जाँचले ‘हत्या’ ठहर गरेपछि संघीय अनुसन्धान ब्युरोले यसको अनुसन्धान गरिरहेको छ।
आइसका अनुसार, सन् २०२६ को अहिलेसम्मको अवधिमा हिरासतमा २० जनाको मृत्यु भइसकेको छ। गत वर्ष यो संख्या ३३ थियो भने सन् २०२४ मा ११ जनाको मृत्यु भएको सार्वजनिक गरिएको थियो। सन् २०२२ देखि नै हिरासतमा मृत्यु हुनेको संख्या हरेक आर्थिक वर्ष बढ्दै गएकाले अक्टोबर १, २०२१ देखि मार्च ३१, २०२६ सम्मको अवधिलाई समेटेर प्रणालीगत छानबिन गर्न लागिएको इन्स्पेक्टर जनरलले जनाएका छन्।
यस विषयमा अमेरिकी संसदको ‘हाउस एप्रोप्रिएसन्स कमिटी’ को सुनुवाइका क्रममा डेमोक्रेटिक सांसद लाउरेन अन्डरवुड र होमल्याण्ड सेक्युरिटी सेक्रेटरी मार्कवेन मुलिनबीच बहस समेत भएको थियो। सांसद अन्डरवुडले “ऐतिहासिक रूपमा उच्च मृत्युदर” बारे प्रश्न उठाउँदा सेक्रेटरी मुलिनले उक्त आरोप अस्वीकार गर्दै इलिनोइस राज्यको जेलमा मर्नेको दर आइस हिरासतको भन्दा दोब्बर रहेको दाबी गरे।
डिएचएसका प्रवक्ताले पनि मृत्युदरमा कुनै अप्रत्याशित वृद्धि नभएको दाबी गर्दै हिरासतमा उचित खाना, पानी, चिकित्सा उपचार र कानुनी पहुँच दिइएको भन्दै आफ्नो बचाउ गरेका छन्।
यसैबीच, आइसले हिरासतमा हुने मृत्युको सूचना सार्वजनिक गर्ने आफ्नो नीतिमा परिवर्तन गरेको छ। नयाँ नीति अनुसार, अब भौतिक रूपमा हिरासतमा रहेकै बेला मृत्यु भएमा मात्र विवरण सार्वजनिक गरिनेछ। यसअघि हिरासतमा बिरामी परेर अस्पताल भर्ना भएका वा रिहा भएको ३० दिनभित्र मृत्यु भएकाहरूको पनि विवरण राखिन्थ्यो। तथ्याङ्क अनुसार यस वर्ष कम्तीमा ११ जना आप्रवासीको अस्पतालमा मृत्यु भइसकेको छ, जसलाई अब नयाँ नीतिले समेट्ने छैन। सेक्रेटरी मुलिनले हिरासतमा नरहेका व्यक्तिहरूको मृत्युको सूचना एजेन्सीले दिइरहनुको कुनै अर्थ नहुने तर्क गरेका छन्।
अर्कोतर्फ, बल प्रयोगसम्बन्धी छानबिन लुइसियानाको एक हिरासत केन्द्रमा घटेका दुईवटा गम्भीर घटनापछि सुरु गरिएको हो। त्यहाँ सुरक्षाकर्मीले प्रतिबन्धित घाँटी थिच्ने कार्य प्रयोग गरेको र कोठाको ढोका बन्द नगरेको भन्दै एक जना थुनुवालाई कलमले घोचेको पाइएको थियो। हालै मात्र टेक्ससको लारेडोस्थित वेब काउन्टी डिटेन्सन सेन्टरमा ६३ वर्षीय मेक्सिकन नागरिक फेलिक्स अल्कोर्टा-रोड्रिगेजको मृत्यु भएको छ, जसको शव परीक्षण प्रतिवेदन आउन बाँकी छ।