प्रकाशित मिति : ६ चैत्र २०८२, शुक्रबार
अमेरिकी सिनेटको ‘होमल्याण्ड सेक्युरिटी एन्ड गभर्नमेन्टल अफेयर्स’ कमिटीले बिहीबार सिनेटर मार्कवेन मुलिनलाई डिपार्टमेन्ट अफ होमल्याण्ड सेक्युरिटीको नेतृत्व गर्नका लागि मनोनयन गरेको छ। कमिटीको यो निर्णयसँगै मुलिनको मनोनयन अब पूर्ण सदनमा मतदानका लागि जाने बाटो खुलेको छ, जुन अर्को हप्तासम्ममा हुनसक्नेछ।
कमिटीमा भएको मतदानमा मुलिनको पक्षमा ८ र विपक्षमा ७ मत परेको थियो। रोचक कुरा के छ भने, कमिटीका अध्यक्ष तथा रिपब्लिकन सिनेटर र्यान्ड पलले मुलिनको विपक्षमा मतदान गर्ने एक्लो रिपब्लिकन सदस्य बने। तर, पेन्सिलभेनियाका डेमोक्रेटिक सिनेटर जोन फेटरम्यानले मुलिनलाई समर्थन गरेपछि उनको मनोनयन प्रक्रिया अगाडि बढ्न सफल भएको हो।
बिहीबारको मतदानअघि बुधबार भएको सुनुवाइ निकै तनावपूर्ण रहेको थियो। सिनेटर र्यान्ड पलले मुलिनमाथि गम्भीर आरोप लगाउँदै उनी जस्तो व्यक्ति सुरक्षा निकायको नेतृत्वका लागि योग्य नभएको तर्क गरेका थिए। पलले मुलिनले विगतमा आफूलाई सर्प भनेको र २०१७ मा छिमेकीले आफूमाथि गरेको भौतिक आक्रमणको समर्थन गरेको आरोप लगाए। पलले प्रश्न गरे, “आफ्ना राजनीतिक प्रतिद्वन्द्वीमाथि हुने हिंसाको प्रशंसा गर्ने व्यक्तिले कसरी बल प्रयोगको सीमा बुझ्नुपर्ने एजेन्सीको नेतृत्व गर्न सक्छ?”
मुलिनले भने पलसँग आफ्नो व्यक्तिगत सम्बन्ध राम्रो नभएको स्वीकार गर्दै आफूले काम गर्ने शैली फरक रहेको बताए। ओक्लाहोमाका रिपब्लिकन मुलिनले मतभेदका बाबजुद आफू डीएचएस सचिवको रूपमा जिम्मेवारी वहन गर्न सक्षम रहेको दाबी गरे। ४८ वर्षीय मुलिन पूर्व मार्सल आर्ट्स खेलाडी र व्यवसायी हुन्, जसले १० वर्ष तल्लो सदनमा र २०२३ देखि माथिल्लो सदन सिनेटमा ओक्लाहोमाको प्रतिनिधित्व गर्दै आएका छन्।
राष्ट्रपति डोनाल्ड ट्रम्पले क्रिस्टी नोएमलाई हटाएर मुलिनलाई यो पदका लागि मनोनित गरेका हुन्। ट्रम्पले मुलिनलाई मागा वारियरको संज्ञा दिँदै उनले अमेरिका फर्स्ट एजेन्डालाई अगाडि बढाउने विश्वास व्यक्त गरेका छन्। अध्यागमन प्रवर्तन र विज्ञापन खर्चका विषयमा विवादमा परेपछि नोएमलाई पदमुक्त गरिएको थियो। अब सिनेटको पूर्ण बैठकले अनुमोदन गरेमा मुलिनले अमेरिकी सुरक्षा र अध्यागमन व्यवस्थापनको कमाण्ड सम्हाल्नेछन्।