प्रकाशित मिति : १८ चैत्र २०८२, बुधबार
अमेरिकाको डिपार्टमेन्ट अफ होमल्याण्ड सेक्युरिटी (डिएचएस)ले कागजातविहीन आप्रवासीहरूलाई हिरासतमा राख्न थप ठुला गोदामहरू खरिद गर्ने योजना तत्कालका लागि रोकेको छ। डिपार्टमेन्टका दुई वरिष्ठ अधिकारीका अनुसार यो निर्णय अस्थायी हुन सक्नेछ। हाल खरिद प्रक्रिया रोकिए पनि यसअघि नै खरिद भइसकेका सुविधाहरूलाई भने प्रयोगमा ल्याउने तयारी भइरहेको छ।
हालै नियुक्त भएका डिएचएस सेक्रेटरी मार्कवेन मुलिनले अध्यागमन प्रवर्तन र हिरासत सम्बन्धी नीतिहरूमा कस्तो परिवर्तन गर्नेछन् भन्ने स्पष्ट भइसकेको छैन। पूर्व सेक्रेटरी क्रिस्टी नोएमको पालामा सुरु गरिएको यो योजनालाई मुलिनले पुनरावलोकन गर्न समय लिएको बताइएको छ। सन् २०२६ को वसन्तसम्मको तथ्याङ्क अनुसार देशभर ११ वटा ठुला गोदामहरू खरिद गरिसकिएको छ, जसको कुल लागत ३८ अर्ब डलरभन्दा बढी अनुमान गरिएको छ।
राष्ट्रपति डोनाल्ड ट्रम्पका लागि सीमा सुरक्षा र अध्यागमन उच्च प्राथमिकतामा रहे पनि हालैको एक सर्वेक्षणले यस विषयमा जनमत केही नकारात्मक देखाएको छ। विशेष गरी पूर्व डिएचएस सेक्रेटरी नोएमले अमेरिकी सहरहरूमा सङ्घीय एजेन्टहरूको परिचालन बढाएपछि मतदाताहरू असन्तुष्ट देखिएका थिए। पूर्व ओक्लाहोमा सिनेटर मुलिनलाई गत हप्ता मात्र महान्यायाधिवक्ता पाम बोन्डीले शपथ खुवाएका थिए।
नोएमको कार्यकालमा आइसले प्रति भवन ८ हजारसम्म आप्रवासी अटाउने क्षमताका मेगा गोदामहरू किनेको थियो। तर, धेरै ठाउँमा स्थानीय नेता र कंग्रेस सदस्यहरूले यसको विरोध गरेका छन्। मेरिल्यान्ड राज्यले त हागेरस्टाउन नजिकैको गोदाम विकास रोक्न मुद्दा नै जितेको छ। यस्तै, मिसिसिपीका सिनेटर रोजर विकरले आर्थिक विकासका लागि छुट्टाइएको ठाउँमा १० हजार कैदी राख्ने योजनाको कडा आलोचना गरेका थिए।
आफ्नो नियुक्ति सुनुवाइका क्रममा सेक्रेटरी मुलिनले गोदाम खरिद गर्नुअघि स्थानीय समुदायका नेताहरूसँग सहकार्य गर्ने प्रतिबद्धता जनाएका थिए। उनले आफू राष्ट्रपतिले तोकेको लक्ष्य पुरा गर्न र स्थानीय समुदायसँग राम्रो साझेदार बनेर काम गर्न इच्छुक रहेको बताएका छन्। अर्कोतर्फ, अध्यागमन क्षेत्रमा काम गर्नेहरूले भने यस्ता ठुला गोदामहरूमा सुरक्षा सम्बन्धी गम्भीर समस्या उत्पन्न हुन सक्ने भन्दै चिन्ता व्यक्त गरेका छन्।