प्रकाशित मिति : असार ६, २०८२ शुक्रबार
स्विट्जरल्याण्ड सरकारले शुक्रबार एक महत्वपूर्ण निर्णय गर्दै सिरियामाथि लगाइएको आर्थिक प्रतिबन्धको ठूलो हिस्सा हटाउने घोषणा गरेको छ। प्रतिबन्ध हटाइएका क्षेत्रहरूमा सिरियाको केन्द्रीय बैंकसमेत परेको छ।
स्विट्जरल्याण्डको सर्वोच्च कार्यकारी निकाय संघीय परिषद्का अनुसार, यो निर्णय सिरियाको आर्थिक पुनःउत्थानलाई सघाउने र समावेशी तथा शान्तिपूर्ण राजनीतिक रूपान्तरणलाई प्रोत्साहन गर्ने उद्देश्यले गरिएको हो।
सन् २०२४ डिसेम्बरमा सिरियाली पूर्व राष्ट्रपति बशर अल-असदको सत्ताच्युत भएपछि त्यहाँको राजनीतिक परिदृश्यमा ठूलो परिवर्तन आएको थियो। त्यसयता स्विट्जरल्याण्डले मार्च महिनामा प्रारम्भिक रूपमा केही प्रतिबन्ध सहज बनाइसकेको थियो। अब भने सरकारले थप कदम अघि बढाउँदै वित्तीय सेवा प्रदान, बहुमूल्य धातुको व्यापार, र विलासी वस्तुहरूको निर्यातसम्बन्धी प्रतिबन्धहरू हटाएको छ।
यसै क्रममा स्विस सरकारले सिरियाको केन्द्रीय बैंकसहित कुल २४ निकाय तथा संस्थाहरूलाई प्रतिबन्ध सूचीबाट हटाएको छ। तथापि, पुरानो सरकारसँग प्रत्यक्ष सम्बन्ध रहेका व्यक्ति र संस्थाहरूमा भने लक्षित प्रतिबन्ध कायम राखिने बताइएको छ।
स्विट्जरल्याण्डको यो निर्णय युरोपेली संघ (इयु)को पछिल्लो घोषणापछि आएको हो, जसअन्तर्गत ईयूले पनि मे महिनाको अन्त्यमा सिरियामाथिको आर्थिक प्रतिबन्ध हटाउने निर्णय लिएको थियो। यस्तै, अमेरिकी ट्रेजरी विभागले पनि सोही महिनामा यस्तै कदम चालेको थियो।
स्विट्जरल्याण्डको संघीय परिषद्ले जारी गरेको विज्ञप्तिमा भनिएको छ, “देशको आर्थिक अवस्था सुधार गर्न र स्थायित्व कायम गर्न अन्तर्राष्ट्रिय सहयोग अपरिहार्य छ। प्रतिबन्ध हटाउने यो निर्णय त्यसैको भाग हो।”
अन्तर्राष्ट्रिय कूटनीतिक वृत्तले स्विट्जरल्याण्डको यस कदमलाई सिरियाको पुनर्निर्माण र स्थायीतर्फको सकारात्मक संकेतका रूपमा हेरिरहेको छ। अब हेर्न बाँकी छ कि यो कदमले सिरियाली जनताको जीवनस्तर र राजनीतिक स्थायित्वमा कस्तो प्रभाव पार्नेछ।