प्रकाशित मिति : ८ जेष्ठ २०८३, शुक्रबार
Photo by Jorge Fernández Salas
स्पेन सरकारले देशको आर्थिक वृद्धिलाई तीव्रता दिन करिब ५ लाख कागजातविहीन कामदारहरूलाई कानुनी हैसियत दिने घोषणा गरेको छ। यस कार्यक्रम अन्तर्गत आप्रवासीहरूलाई उनीहरूको सीप अनुसारको कामसँग जोडिने योजना बनाइएको स्पेनका शीर्ष आप्रवासन अधिकारीले जानकारी दिएका छन्।
गत जनवरीमा घोषणा गरिएको यस कार्यक्रमको स्पेन र युरोपका दक्षिणपन्थी नेताहरूले कडा आलोचना गरे तापनि समाजवादी नेतृत्वको गठबन्धन सरकारले भने यो कदमको बचाउ गरेको छ। सरकारका अनुसार, देशको जनसङ्ख्या बुढो हुँदै गएको अवस्थामा युवा श्रमशक्तिको आगमनले स्पेनको अर्थतन्त्रलाई अन्य युरोपेली देशहरूभन्दा अगाडि बढाउन मद्दत पुग्नेछ।
यो नियमित प्रक्रियालाई रोक्न दक्षिणपन्थी समूहहरूले अदालतमा निषेधाज्ञाको माग गर्दै निवेदन दायर गरेका थिए। उक्त मुद्दामा शुक्रवार भएको सर्वोच्च अदालतको सुनुवाइका क्रममा सरकारी वकिलहरूले कार्यक्रमको पहिलो महिनामै ५ लाख ४९ हजार ५ सय ९६ जनाले आवेदन दिएको जानकारी दिएका छन्।
यो सङ्ख्या सुरुवाती अनुमानभन्दा केही बढी हो। सरकारले हालसम्म ९१ हजार ५ सय ५ जनालाई वर्क परमिट प्रदान गरिसकेको छ, यद्यपि अध्यागमन मन्त्रालयले यस तथ्याङ्कलाई आधिकारिक रूपमा पुष्टि गर्न गरेको छैन।
स्पेनकी आप्रवासन राज्यमन्त्री पिलार कान्सेलाले एक अन्तर्वार्तामा राज्यले १० लाखसम्म आवेदनहरू व्यवस्थापन गर्न सक्ने क्षमता राखेको बताएकी छन्। उनले आप्रवासीहरूलाई औपचारिक रोजगारी खोज्न मद्दत गर्ने विशेष योजना सरकारसँग रहेको समेत उल्लेख गरिन्।
कान्सेलाका अनुसार यो कदम मानवीय र आर्थिक दुवै दृष्टिकोणबाट बुद्धिमानीपूर्ण छ, जसले देशको सार्वजनिक सेवा र निवृत्तिभरण प्रणालीलाई दीर्घकालीन रूपमा धान्न मद्दत गर्नेछ। सरकारी अनुमान अनुसार, आगामी एक दशकमा स्पेनको कल्याणकारी राज्य व्यवस्थालाई निरन्तरता दिन थप २४ लाख सामाजिक सुरक्षा करदाताहरूको आवश्यकता पर्नेछ। हाल स्पेनमा मुख्यत: ल्याटिन अमेरिकाका करिब ८ लाख ४० हजार गैरकानुनी आप्रवासीहरू अनौपचारिक क्षेत्रमा कार्यरत छन्।
रोजगारी मिलान रणनीतिको मुख्य उद्देश्य हजारौँ कामदारहरूलाई अनौपचारिक क्षेत्र बाट बाहिर निकालेर मुख्य आर्थिक क्षेत्रमा देखिएको श्रम अभावलाई सम्बोधन गर्नु हो। यसका लागि आप्रवासन मन्त्रालयले अस्थायी कार्य अनुमति पाएका व्यक्तिहरूको सीप र इच्छा बुझ्न एक स्वैच्छिक सर्वेक्षण गर्नेछ।
सरकारले निर्माण, पर्यटन, यातायात र केयर गिभिङ जस्ता क्षेत्रका व्यावसायिक समूहहरूसँग साझेदारी गरेर श्रमको माग र आप्रवासीहरूको आपूर्तिबीच समन्वय गर्ने योजना बनाएको छ।
सन् २००५ को यस्तै प्रकृतिको आप्रवासी नियमितीकरण कार्यक्रमले अनौपचारिक क्षेत्रमा केही रोजगारी गुमेको तथ्य औँल्याउँदै एसाडे बिजनेस स्कूलको एक शोधपत्रले श्रम निरीक्षण बढाउन र औपचारिक रोजगारीमा रूपान्तरणका लागि थप सहयोग कार्यक्रम ल्याउन सिफारिस गरेको छ। राज्यमन्त्री कान्सेलाले यसपटक सरकारले श्रम निरीक्षणलाई थप कडा बनाउने प्रतिबद्धता व्यक्त गरेकी छन्।