प्रकाशित मिति : २६ असार २०८३, शुक्रबार
अमेरिकी राष्ट्रपति ट्रम्प । तस्वीर : एलेक्स ब्रान्डन/एपी-रासस
अमेरिकी राष्ट्रपति डोनाल्ड ट्रम्पले शुक्रबार देशमा आवासको उपलब्धता र सहजता बढाउने उद्देश्यले ल्याइएको एक ठूलो आवास विधेयकमा हस्ताक्षर नगर्ने निर्णय गरेका छन्। पर्याप्त समर्थन नभएका कारण पारित हुन नसकेको कडा मतदाता परिचयपत्र विधेयक संसद्ले पारित नगरेको विरोधमा उनले यस्तो कदम चालेको बताइएको छ।
अमेरिकी संसद्बाट पूर्ण रूपमा स्वीकृत भई ह्वाइट हाउस पठाइएको आवास विधेयकमा म हस्ताक्षर गर्ने छैन। अमेरिकी माथिल्लो सदन ‘द सेभ अमेरिका एक्ट’ पारित गर्न सक्षम नभएको विरोधमा मैले यो निर्णय गरेको हुँ, ट्रम्पले सामाजिक सञ्जालमा लेखेका छन्।
यद्यपि, ट्रम्पले हस्ताक्षर नगरे पनि यो आवास सम्बन्धी विधेयक शुक्रबार नै कानुन बन्न सक्छ। राष्ट्रपतिसँग कुनै पनि विधेयकलाई रोक्न वा भिटो प्रयोग गर्न १० दिनको समय हुन्छ। तर, ट्रम्पको पोस्टमा उनले केवल हस्ताक्षर नगर्ने मात्र उल्लेख गरेका छन्, भिटो प्रयोग गर्ने कुरा स्पष्ट पारिएको छैन।
द्विपक्षीय समर्थन प्राप्त यो आवास विधेयकलाई ट्रम्पले अस्वीकार गरेपछि मध्यावधि निर्वाचनको वर्षमा आफ्नै पार्टीभित्रको तनाव अझ बढेको छ। बढ्दो महँगीका कारण चिन्तित बनेका मतदाताहरूको समस्या समाधान गर्ने पार्टीको प्रयासमा यसले बाधा पुर्याएको छ।
कडा मतदाता परिचयपत्र विधेयक पारित गराउनका लागि दबाब दिने उद्देश्यले ट्रम्पले यो विधेयकलाई हतियार बनाएको घोषणा गरेको एक साताभन्दा बढी समयपछि यो सामाजिक सञ्जाल पोस्ट आएको हो।
२१औं शताब्दी रोड टु हाउजिङ एक्ट नाम दिइएको यस विधेयकको मुख्य उद्देश्य आवासको लागत घटाउनु र नयाँ घर निर्माण कार्यलाई तीव्रता दिनु हो। अमेरिकाको आवास सहजता सम्बन्धी समस्यालाई सम्बोधन गर्न दशकौंपछि गरिएको यो सबैभन्दा ठूलो र व्यापक प्रयास हो।