प्रकाशित मिति : असार १२, २०८१ बुधबार
रुसी सेनामा कार्यरत थप एकजना नेपाली युवाको मृत्यु भएको छ । तनहुँको आँबुखैरेनी गाउँपालिका–५ भोटेश्वारा घर भएका रन्जित गुरुङको मृत्यु भएको हो ।
रुसी सेनामा भर्ना भएका गुरुङकै साथीले निजका परिवारलाई फोन गरेर गुरुङको मृत्यु केहिदिन अघि भएको जानकारी गराएको छिम्केश्वरीस्थित कन्यादेवी माध्यमिक विद्यालयका प्रधानाध्यापक सूर्यमानसिंह गुरुङले बताउनु भयो ।
सात महिना अगाडि रुसी सेनामा भर्ना भएका गुरुङ १५ दिनदेखि परिवारसँग सम्पर्कविहीन रहनु भएको थियो । त्यसअगाडि भने परिवारसँग उहाँको निरन्तर कुराकानी भइरहेको थियो ।
गुरुङका साथीले आफूहरु द्वन्द्वग्रस्त क्षेत्रमा जाँदा उक्त घटना भएको र आफु पनि घाइते भएको परिवारलाई जानकारी दिएका छन । रुसी सेनामा भर्ना भएका तनहुँका ९ जना युवा परिवारको सम्पर्कमा नरहेको बताइएको छ ।
जिल्ला प्रशासन कार्यालय तनहुँमा रहेको आप्रवासी स्रोत केन्द्रका अनुसार जिल्लाका ९ जना युवा रुसी सेनामा भर्ना भएको र आफन्तको सम्पर्कमा नरहेको भन्दै निवेदन परेको छ ।
