प्रकाशित मिति : २४ चैत्र २०८२, मंगलबार
अमेरिकाको विस्कन्सिनस्थित सार्वजनिक विश्वविद्यालयको बोर्डले अध्यक्ष जे. ओ. रोथम्यानलाई पदबाट हटाउने निर्णय गरेको छ।
रिपब्लिकन नेतृत्वको राज्य विधानसभासँग सम्झौता गरेको आरोप लागेपछि उनलाई बर्खास्त गरिएको हो। बोर्डले राजीनामा दिन दिएको दबाब उनले अस्वीकार गरेपछि डेमोक्र्याट र संकाय सदस्यहरू उनीप्रति थप असन्तुष्ट बनेका थिए।
बोर्डका १७ सदस्यमध्ये गभर्नर टोनी एभर्सद्वारा नियुक्त डेमोक्र्याटहरूले रोथम्यानलाई हटाउने पक्षमा मतदान गरे । विश्वविद्यालय प्रणालीका अनुसार यो परिवर्तन तत्काल लागू हुनेछ। बोर्डले रोथम्यानमाथि “विश्वास गुमाएको” उल्लेख गरेको छ।
सन् २०२२ मा पदभार ग्रहण गरेका रोथम्यान यसअघि नै रिपब्लिकन विधायकहरूसँग केही सम्झौता गरेपछि बोर्डसँग विवादमा परेका थिए। उक्त सम्झौतामा विविधता, समानता र समावेशीता सम्बन्धी पदहरू रोक्ने नीति समावेश थियो।
१३ वटा विश्वविद्यालय सम्मिलित यस प्रणालीमा सामान्य शैक्षिक आवश्यकताहरू लागू गर्ने क्रममा स्थानीय स्वायत्तता सीमित गरेको भन्दै राज्यभरका संकाय सदस्यहरू पनि उनीसँग असन्तुष्ट थिए। यस प्रणालीमा १,६४,००० भन्दा बढी विद्यार्थीहरू अध्ययनरत छन्।
रिपब्लिकन विधायकहरूले भने रोथम्यानलाई हटाउने निर्णयको आलोचना गरेका छन्। विस्कन्सिन राज्य विधानसभाका सभामुख रोबिन भोसले बैठकअघि रोथम्यानको कार्यसम्पादनको प्रशंसा गर्दै बजेट सम्झौतामा उनले देखाएको कुशलता महत्त्वपूर्ण रहेको बताएका थिए। मतदानअघि गभर्नर एभर्सले यो निर्णय बोर्डको अधिकार क्षेत्रभित्र रहेको बताए।
सन् २०२३ मा रोथम्यानले विविधता, समानता र समावेशीता सम्बन्धी दृष्टिकोणलाई “पुनर्कल्पना” गर्न रिपब्लिकनहरूसँग सम्झौता गरेका थिए। रिपब्लिकनहरूले यसअघि स्वीकृत करोडौँ डलरको बजेट रोक्का गरेपछि, यो सम्झौतामार्फत उनले तलब वृद्धि र अन्य खर्चको बाटो खुला गराएका थिए।