प्रकाशित मिति : बैशाख २९, २०८२ सोमबार
अमेरिकी राष्ट्रपति डोनाल्ड ट्रम्पले टर्कीमा यो साता हुने सम्भावित युक्रेन-रूस वार्तामा सहभागी हुने प्रस्ताव राखेका छन्। युरोपेली देशहरूले रूसलाई युक्रेन युद्धमा ३० दिनको युद्धविराम स्वीकार गर्न दबाब दिइरहेका बेला ट्रम्पको यो प्रस्ताव आएको हो।
युक्रेनी राष्ट्रपति भोलोदिमिर जेलेन्स्कीले आइतबार शान्ति वार्ताको उतार-चढाव प्रक्रियामा नयाँ मोड ल्याउँदै इस्तानबुल यात्रा गर्ने र रूसी राष्ट्रपति भ्लादिमिर पुटिनसँग भेट्ने बताएका थिए। ट्रम्पले ह्वाइट हाउसमा पत्रकारहरूसँग कुरा गर्दै इस्तानबुलको वार्ता उपयोगी हुन सक्ने र आफू बिहीबार क्षेत्रमा रहँदा त्यसमा सहभागी हुन सक्ने बताए। उनको यो साता साउदी अरब, संयुक्त अरब इमिरेट्स र कतार भ्रमणको तालिका छ।
“मेरा धेरै बैठकहरू छन्, तर म त्यहाँ उडान गर्ने सोचमा छु। यदि मलाई केही सम्भव छ जस्तो लाग्छ भने, यो गर्नुपर्छ,” ट्रम्पले आफ्नो दोस्रो कार्यकाल सुरु भएपछिको दोस्रो विदेश यात्राअघि भने। “टर्कीमा बिहीबारलाई कम नआँक्नुहोस्,” उनले थपे।
जेलेन्स्कीले ट्रम्पको भनाइको जवाफमा सामाजिक सञ्जाल एक्समा लेखेका छन्, “मलाई आशा छ रूसीहरूले यो बैठकबाट भाग्ने छैनन्। राष्ट्रपति ट्रम्प हामीसँग टर्कीको बैठकमा हुनुभयो भने युक्रेनका सबैले प्रशंसा गर्नेछौँ।” उनले यो “ठीक विचार” भएको बताए।
यसैबीच, जर्मन सरकारले सोमबार रूसले दिनको अन्त्यसम्म ३० दिनको युद्धविराम पालना नगरे युरोपले नयाँ प्रतिबन्धहरू तयार गर्ने चेतावनी दिएको छ। युक्रेनको सेनाले रूसले पूर्वी युक्रेनमा दर्जनौँ आक्रमण गरेको र १०० भन्दा बढी ड्रोनहरू प्रयोग गरेर रातभर आक्रमण गरेको जनाएको छ।
चार युरोपेली शक्तिका नेताहरू शनिबार किभ पुगेर सोमबारदेखि बिना शर्त ३०(दिनको युद्धविरामको माग गरेका थिए। पुटिनले यो प्रस्ताव अस्वीकार गर्दै इस्तानबुलमा प्रत्यक्ष वार्ता प्रस्ताव गरेका छन्, जसले युद्धविरामतर्फ लैजान सक्ने उनको भनाइ छ।