प्रकाशित मिति : ३२ असार २०८३, बिहिबार
PhotoL: Edmundas Stundzius/ Unsplash
म्यानमारको तटीय क्षेत्रमा हालैका दिनहरूमा ५०० भन्दा बढी मानिस बोकेका दुईवटा डुङ्गाहरू दुर्घटनामा परेको हुनसक्ने संयुक्त राष्ट्रसङ्घका निकायहरूले जनाएका छन्। गृहयुद्धले जर्जर बनेको म्यानमारबाट सुरक्षित गन्तव्य र राम्रो जीवनको खोजीमा जोखिमपूर्ण समुद्री यात्रा गर्ने क्रममा यो ठूलो मानवीय क्षति भएको आशङ्का गरिएको हो।
संयुक्त राष्ट्रसङ्घीय शरणार्थी उच्चायुक्त र अन्तर्राष्ट्रिय बसाइँसराइ सङ्गठनले जारी गरेको संयुक्त विज्ञप्ति अनुसार, यी डुङ्गाहरू जुन महिनाको अन्त्यतिर म्यानमारको राखाइन राज्यबाट प्रस्थान गरेका थिए। डुङ्गामा सवार अधिकांश यात्रुहरू अल्पसङ्ख्यक रोहिङ्ग्या समुदायका थिए, जसमा बंगलादेशका शरणार्थी शिविरबाट आएका मानिसहरू समेत सामेल रहेको प्रारम्भिक सूचनामा उल्लेख छ।
विज्ञप्तिमा भनिएको छ, यद्यपि यी घटनाहरू र हताहतको आधिकारिक पुष्टि हुन बाँकी छ, तर व्यापक रूपमा भएको यो सम्भावित मानवीय क्षतिप्रति संयुक्त राष्ट्रसङ्घीय शरणार्थी उच्चायुक्त र अन्तर्राष्ट्रिय बसाइँसराइ सङ्गठन गम्भीर रूपमा चिन्तित छन्।
राष्ट्रसङ्घका अनुसार करिब २५० जना सवार पहिलो डुङ्गा प्रस्थान गरेको केही समयमै सम्पर्कविहीन भएको थियो। त्यस्तै, करिब २८० जना बोकेको दोस्रो डुङ्गा गत जुलाई ८ मा म्यानमारको इरावदी तट नजिकै डुबेको विश्वास गरिएको छ।
यी यात्रुहरूले नियमित रूपमा अनुकूल मौसम हुने अनुकूल महिनाभन्दा बाहिर यात्रा गरेका थिए, जुन समयमा समुद्री लहर र आँधीका कारण जलयात्रा निकै खतरनाक मानिन्छ।
म्यानमारमा भइरहेको हिंसा, चरम गरिबी र बंगलादेशका खचाखच भरिएका शरणार्थी शिविरहरूको दयनीय अवस्थाका कारण रोहिङ्ग्या मुस्लिमहरू वर्षौँदेखि साना र कमजोर काठे डुङ्गाहरूमा जीवन जोखिममा राखेर मलेसिया, इन्डोनेसिया र थाइल्याण्ड जस्ता मुलुकहरू पुग्ने प्रयास गरिरहेका छन्। गत वर्ष मात्रै अण्डमान सागर र बङ्गालको खाडीमा ९०० भन्दा बढी रोहिङ्ग्या शरणार्थीको मृत्यु भएको वा बेपत्ता भएको राष्ट्रसङ्घको तथ्याङ्क छ, जसका कारण यो मार्ग शरणार्थीका लागि संसारकै सबैभन्दा घातक समुद्री मार्ग बन्न पुगेको छ।
सन् २०१७ मा म्यानमारको सेनाले राखाइन प्रान्तमा चलाएको हिंसक सैन्य अभियानपछि रोहिङ्ग्याहरूको ठूलो पलायन सुरु भएको थियो। त्यस बेला करिब ७ लाख ३० हजार रोहिङ्ग्याहरूले सीमा पार गरेर बंगलादेशमा शरण लिएका थिए। म्यानमार सरकारले उनीहरूमाथि भएका दमन र मानवअधिकार उल्लङ्घनका घटनाहरूलाई अस्वीकार गर्दै आएको छ भने रोहिङ्ग्याहरूलाई आफ्ना नागरिक नमानेर ‘अवैध आप्रवासी’ को दर्जा दिएको छ।
सन् २०२१ मा म्यानमारमा भएको सैन्य विद्रोह पछि त्यहाँको अवस्था झनै बिग्रिएको छ। हाल देशव्यापी रूपमा चर्किएको गृहयुद्धको चपेटामा राखाइन राज्य पनि परेको छ, जहाँ रोहिङ्ग्याहरू सरकारी सेना र विद्रोही समूह ‘आराकान आर्मी’ को दोहोरो भिडन्तमा परेका छन्।