प्रकाशित मिति : २८ असार २०८३, आइतबार
तस्वीर : आइस
अमेरिकाको मिनेसोटा राज्यका अधिकारीहरूबाट गत महिना मात्रै माफी पाएका लाओसका एक नागरिकलाई देश निकाला गरिएको अमेरिकी विदेशमन्त्री मार्को रुबियोले घोषणा गरेका छन्।
लाओसबाट आप्रवासीका रूपमा अमेरिका आएका टौ लु वाङमाथि सन् २००२ देखि २००४ को बीचमा एक बालिकालाई जबर्जस्ती करणी गरेको अभियोग लागेको थियो। सन् २००६ मा उनलाई प्रथम-डिग्रीको आपराधिक यौन दुराचार मामिलामा दोषी ठहर गर्दै देश निकाला गर्ने आदेश दिइएको थियो। तर, सुरुवाती समयमा लाओस सरकारले आफ्ना नागरिक फिर्ता लिन अस्वीकार गरेपछि वाङले झन्डै दुई दशक मिनेसोटामा नै बिताएका थिए।
सन् २०२५ को डिसेम्बरमा आप्रवासीहरू विरुद्धको एक ठुलो धरपकडका क्रममा सङ्घीय अधिकारीहरूले उनलाई नियन्त्रणमा लिएका थिए। तर, सन् २०२६ को फेब्रुअरीमा एक सङ्घीय न्यायाधीशले उनलाई अमेरिकी आइसको हिरासतबाट मुक्त गर्न आदेश दिएका थिए।
यसै वर्षको जुन महिनामा मिनेसोटाको माफी बोर्डले वाङलाई माफी दिएको थियो। उनले आफ्नो गल्तीप्रति पश्चात्ताप व्यक्त गरेको र पीडितले पनि उनलाई माफी दिइसकेको भन्दै पत्र पठाएपछि बोर्डले उक्त निर्णय गरेको ‘मिनेसोटा स्टार ट्रिब्यून’ ले जनाएको छ।
स्टार ट्रिब्यूनले प्राप्त गरेको उक्त पत्रमा पीडितले आफूले शान्ति पाएको र वाङलाई माफ गरिदिएको उल्लेख गरेकी छिन्। पत्रमा भनिएको छ, “उनी अहिले उही पुराना व्यक्ति होइनन्। मैले उनी बदलिएको देखेकी छु।
तर, डोनाल्ड ट्रम्प प्रशासनले यस मामिलालाई मिनेसोटाका गभर्नर टिम वाल्ज र अन्य डमोक्र्याटिक अधिकारीहरूमाथि आप्रवासीहरूलाई देश निकाला हुनबाट जोगाएको आरोप लगाउने माध्यम बनाएको छ।
यसै साता मैले उनको अमेरिकामा रहने कानुनी हैसियत रद्द गरिदिएँ। यसको परिणामस्वरूप सङ्घीय एजेन्टहरूले उनलाई हिरासतमा लिए र आजको मितिसम्म उनलाई अमेरिकाबाट हटाइसकिएको छ, विदेशमन्त्री रुबियोले शुक्रबार पोस्ट गरेको एक भिडियो विज्ञप्तिमा भनेका छन्। हाम्रो यस कदमका कारण यो विदेशी अपराधीले अब कहिल्यै कुनै पनि अमेरिकी नागरिकका लागि खतरा पैदा गर्ने छैन।
यस विषयमा गभर्नर वाल्जको कार्यालयले भने कुनै प्रतिक्रिया दिएको छैन।यसअघि, यसै महिनाको सुरुमा डिपार्टमेन्ट अफ होमल्यान्ड सेकुरिटीकी मिडिया सम्बन्ध सम्बन्धी उप-सहायक सचिव लरेन बिसले एक विज्ञप्ति जारी गर्दै वाङलाई माफी दिने निर्णय घृणास्पद भएको बताएकी थिइन्।
अमेरिकी प्रतिनिधि सभाका बहुमत सचेतक टम एम्मर लगायत अन्य रिपब्लिकन सांसदहरूले पनि यो निर्णयप्रति आक्रोश व्यक्त गरेका छन्।
एम्मरले एक्समा लेखेका छन्, हाम्रा कमजोर गभर्नरको अर्को एउटा यस्तो कदमप्रति म आक्रोशित र घृणित छु, जसले निर्दोष अमेरिकीहरू भन्दा हिंसक अवैध विदेशीहरूलाई बढी प्राथमिकता दिन्छ।
होमल्यान्ड सेकुरिटीका अनुसार वाङ सन् १९९४ मा पहिलो पटक अमेरिका आएका थिए र उनलाई कानुनी हैसियत दिइएको थियो। तर, सन् २००६ मा दोषी ठहर भएपछि उनको कानुनी हैसियत रद्द गर्दै देश निकालाको अन्तिम आदेश जारी गरिएको थियो।