प्रकाशित मिति : मंसिर २०, २०८१ बिहीबार
गत जुलाईदेखि बेपत्ता भर्जिनियाको मानसास पार्ककी नेपाली नर्स ममता काफ्लेको हत्या अभियोगमा हिराशतमा रहेका पति नरेश भट्टविरुद्धको मुद्दाको अन्तिम सुनुवाई अब सन् २०२५ को सेप्टेम्बरमा हुने भएको छ । यो मुद्दाको सुनुवाई डिसेम्बर ९ मा हुने तय भएतापनि बुधबार प्रिन्स विलियम काउन्टीका न्यायाधीशले यो मुद्दाको सुनुवाई पछि सारेको फैसला सुनाएका हुन् । यस हप्ता ग्रयाण्ड जूरीले उनी विरुद्ध थप गम्भीर अभियोगहरु लगाएपछि मुद्दाको सुनुवाई पछि सारिएको हो ।
यसअगाडि नरेश भट्टविरुद्ध शव लुकाएको अभियोगमात्र लगाइएको भएतापनि जुरीले यसै साता उनी विरुद्ध पहिलो डिग्री हत्याको अभियोग लगाएको छ । भट्टलाई अपराधिक हत्या र शवलाई शारीरिक रूपमा छेडखानी गरेको अभियोग लगाइएको अदालतका कागजातहरूमा उल्लेख गरिएको छ । उक्त अभियोग बुधबार अदालतमा पढेर सुनाइएको थियो । प्रहरीले गत महिना घरभित्र प्राप्त रगत ममताकै भएको डीएनए प्रमाणले पुष्टी गरेको बताएपछि भट्टविरुद्ध हत्या अभियोग लगाइएको हो ।
अब न्यायाधीशले उनीमाथि लगाइएका तीनवटै अभियोगलाई एउटै मुद्दामा समावेश गर्ने निर्णय गरेका छन् । जसले गर्दा कारबाही पछाडि धकेलिएको छ भने वकिलहरूलाई उनीहरूको मुद्दा तयार गर्न थप समय प्राप्त भएको छ । भट्टलाई अब मार्चमा अदालतमा हाजिर गराइने अदालतको अनलाइन रेकर्डमा उल्लेख छ । सन् २०२५ को सेप्टेम्बरको लागि निर्धारित सुनुवाई १६ दिनसम्म चल्ने अपेक्षा गरिएको छ ।
भर्जिनियामा फर्स्ट डिग्री हत्यामा दोषी ठहर भएमा गम्भीर आपराधिक दण्डको सामना गर्नुपर्छ । फर्स्ट डिग्री हत्या भर्जिनियाको कमनवेल्थमा दोश्रो श्रेणीको सबैभन्दा ठूलो अपराध हो। जसमा दोषी ठहर भएमा आजीवन जेल सजाय र १ लाख डलरसम्म जरिवाना हुनसक्छ ।
३७ वर्षीय नरेश भट्टलाई प्रिन्स विलियम काउन्टी जेलमा अगस्त २२ देखि विना धरौटी राखिएको छ । नरेश भट्टले आफ्नो मुद्दाको सुनुवाई जतिसक्दो चाँडो सकाउने प्रयास गरिरहेका छन् ।
प्रहरीले ममता काफ्ले भट्टको शव वा हत्या गरेको हतियार अझै फेला पार्न सकेको छैन । तर अदालतको कागजात अनुसार नरेश भट्टले ममताको हत्या गरी शव लुकाएको विश्वास गरिएको छ । जघन्य हत्याको लागि प्रत्यक्ष अभियोगमा नरेश भट्टलाई जुलाई २९ र अगस्ट २ बीच ममता काफ्ले भट्टको हत्या जानीजानी र योजनावद्ध तरिकाले गरेको आरोप लगाइएको छ।
अघिल्लो अदालतको सुनुवाइको क्रममा अभियोजकहरूले सेलफोन डाटा, भिडियो क्यामेरा, उनको टेस्लाबाट निकालिएको जीपीएस डाटा र लाइसेन्स प्लेट रिडरहरूबाट सङ्कलन गरिएका प्रमाणहरू प्रस्तुत गरे का थिए । जसमा नरेश भट्टले ठूला रद्दीका टोकरीका झोलाहरूमा भएका वस्तुहरू फ्याक्न फोहोर फ्याक्ने स्थानमा यात्रा गरेका थिए।
