प्रकाशित मिति : बैशाख ३, २०८२ बुधबार
अमेरिकी अभिनेत्री मिशेल ट्राच्टेनबर्गको निधन भएको छ । उनको निधन मधुमेहको जटिलताबाट भएको पुष्टि भएको अस्पतालले बताएको छ ।
न्यूयोर्क शहर मेडिकल परीक्षकको कार्यालयका अनुसार अमेरिकी अभिनेत्री मिशेल ट्राच्टेनबर्गको मृत्यु डायबिटीजबाट उत्पन्न जटिलताका कारण भएको हो ।
३९ वर्षीया अभिनेत्री ट्राच्टेनबर्ग फेब्रुअरी महिनामा न्यूयोर्कस्थित आफ्नै अपार्टमेन्टमा अचेत अवस्थामा फेला परेकी थिइन्।
पोस्टमार्टम नगरे पनि टोक्सिकोलोजी परीक्षण अर्थात विष परीक्षण मार्फत उनको मृत्युको कारण पत्ता लगाइएको अधिकारीहरूले जनाएका छन् ।
ट्राच्टेनबर्ग ‘बफी द भ्याम्पायर स्लेयर’ टेलिभिजन श्रृंखलामा मुख्य पात्र बफीको कान्छी बहिनी डन समर्सको भूमिकाबाट सबैभन्दा बढी चर्चामा आएकी थिइन् ।
पछि उनले ‘गसिप गर्ल’ टेलिश्रृंखलामा जर्जिना स्पार्क्स नामकी चलाख र चलाखीपूर्ण पात्रको भूमिका निभाएकी थिइन्।
उनको परिवार यहूदी धर्ममा आस्था राख्ने भएकाले धार्मिक कारण देखाउँदै शव परीक्षणको विरोध गरेका थिए ।
मृत्युमा कुनै आपराधिक गतिविधि वा हिंसाको संकेत नदेखिएका कारण मेडिकल परीक्षक कार्यालयले शव परीक्षण नगर्ने निर्णय गरेको हो ।
ट्राच्टेनबर्गले मृत्यु हुनुअघि लिभर ट्रान्सप्लान्ट गराएकी थिइन् । तर त्यसको समय र कारण स्पष्ट गरिएको छैन । ट्राच्टेनबर्गको अकस्मात मृत्युले उनका प्रशंसकहरूलाई स्तब्ध बनाएको छ ।
उनी सानो उमेरदेखि नै अभिनय क्षेत्रमा सक्रिय थिइन् । ूह्यारियट द स्पाइू जस्ता निकेलोडियनका परियोजनाहरूमा अभिनय गर्दै चर्चामा आएकी थिइन्।
२००० को दशकको सुरुवातमा उनले डेटाइम एमी अवार्डसहित धेरै पुरस्कारहरूमा उनलाई समावेश हुने अवसर पाएकी थिइन । उनले बिभिन्न फिल्महरूमा अभिनय गरेकी थिइन्।
उनको निधनपछि सहकर्मी कलाकारहरूले सामाजिक सञ्जालमा श्रद्धाञ्जली अर्पण गर्दै कामप्रति निकै समर्पित र आफू माया गर्नेका लागि साहसी व्यक्ती भएको भन्दै स्मरण गरेका छन ।