प्रकाशित मिति : भाद्र २२, २०८२ सोमबार
आइस अधिकारी । फाइल तस्वीर । स्रोत : अमेरिकी इमिग्रेशन एण्ड कस्टम्स इन्फोर्समेन्ट
अमेरिकाको शिकागो र बोस्टनमा ट्रम्प प्रशासनले कागजातविहीन आप्रवासीविरुद्धको कारबाही तीव्र पारेको छ। ट्रम्प प्रशासन र संघीय आप्रवासन अधिकारीहरूसँग सहयोग नगर्ने डेमोक्र्याट नेतृत्वका सहरहरूबीचको ताजा टकराव यसैका कारण बढिरहेको छ।
डिपार्टमेन्ट अफ होमल्याण्ड सेक्युरिटीले ‘अपरेसन मिडवे ब्लिट्ज’ घोषणा गर्दै यसले गभर्नर जेबी प्रिट्जकरको ‘स्यान्क्चुअरी’ नीतिका कारण शिकागो र इलिनोइस पुगेका आपराधिक र कागजातविहीन आप्रवासीहरूलाई लक्षित गर्ने बताएको छ।
शिकागोमा कम्तीमा पाँच जनालाई पक्राउ गरिएको छ। पक्राउ परेकामध्ये एक जना फूल बेच्ने कामदार र अर्का बस पर्खिरहेका व्यक्ति थिए। शिकागोकी अल्डरपर्सन जेइलु गुटिएरेजले यसलाई “समुदायलाई आतङ्कित गर्ने प्रयास” भन्दै आलोचना गरिन्। आइसले चार जनालाई पक्राउ गरिएको पुष्टि गरेको छ।
शिकागो र बोस्टनमा सुरु भएका कारबाही जुनमा लस एन्जलसमा भएका अभियानजस्तै देखिएका छन्। सर्वोच्च अदालतले त्यस्ता छापा विशेष सर्तसहित जारी रहन सक्ने आदेश दिएको थियो। लस एन्जलसमा आप्रवासी कारबाहीका प्रमुख अधिकारी ग्रेगरी बोभिनोलाई अब शिकागो पठाइएको छ।
गत हप्ता जर्जियाको हुन्डाई कारखानामा भएको ठूलो छापामारी पनि आगामी कार्यस्थल कारबाहीको पूर्वाभ्यास भएको अधिकारीहरूले बताएका छन्। सीमा नीति प्रमुख टम होम्यानले भने, “तपाईंले देशभरका स्यान्क्चुअरी सहरहरूमा कारबाही देख्नुहुनेछ।”
ट्रम्प प्रशासनले हिंसात्मक अपराध नियन्त्रणका लागि नेशनल गार्ड पनि पठाउन सक्ने सङ्केत दिएको छ। राष्ट्रपति ट्रम्पले “अर्को एक-दुई दिनभित्र” कुन सहरमा गार्ड पठाउने निर्णय हुने बताएका थिए। तर, गत हप्ता संघीय न्यायाधीशले लस एन्जलसमा नेशनल गार्डको प्रयोग अवैध भएको ठहर गरेका थिए।
राजधानी वासिङ्टन डीसीमा करिब २,२०० नेशनल गार्डहरू लामो समयदेखि परिचालनमा रहेका छन्। त्यहाँको सरकारले ट्रम्प प्रशासनविरुद्ध संविधान र संघीय कानुन उल्लङ्घन गरेको भन्दै मुद्दा दायर गरेको छ।