प्रकाशित मिति : जेष्ठ ९, २०८२ बिहीबार
अमेरिकाको वासिङ्टन डीसीमा बुधबार राति भएको गोलीबारीमा सारा मिलग्रिम र यारोन लिस्चिन्स्कीको निधन भयो । उनीहरु इजरायली दूतावासका कर्मचारी थिए । वासिङ्टन डीसीस्थित क्यापिटल यहूदी संग्रहालय बाहिर उनीहरुमाथि शिकागोका ३० वर्षीय इलियास रोड्रिगेज गोली प्रहार गरेका हुन् । मेट्रोपोलिटन प्रहरीले संदिग्ध रोड्रिगेजलाई पक्राउ गरिसकेको छ ।
गोलीबारीमा उनीहरुको ज्यानमात्रै होइन्, विवाह गर्ने र नयाँ घर बसाल्ने सारा र यारोनको सपना चकनाचुर भयो । इजरायली दूतावासमा कार्यरत सारा र यारोनले इन्गेजमेन्टको योजना बनाइरहेका थिए, जुन साराका बाबुआमालाई गोलीबारीपछि मात्र थाहा भयो।
२६ वर्षीया सारा मिलग्रिम कन्सासको प्रेरी भिलेजमा हुर्केकी थिइन्। उनले डेढ वर्षअघि इजरायली दूतावासमा मिसन र प्रतिनिधिमण्डलको भ्रमण आयोजना गर्ने जिम्मेवारी लिएपछि ३० वर्षीय यारोन लिस्चिन्स्कीलाई भेटेकी थिइन्। दूतावासमा अनुसन्धानकर्ता रहेका लिस्चिन्स्कीले मिलग्रिमको परिवारसँग धेरैपटक भेटेका थिए।
“उनी अविश्वसनीय थिए,” साराका बाबु रबर्ट मिलग्रिमले भने। “उनी सारा जस्तै थिए : जोशिलो, बुद्धिमान, आफ्नो कामप्रति समर्पित र सधैं सही कुराको पक्षमा लिने ।”
केही महिनाअघि, साराले आफ्ना बाबुआमालाई यारोनसँग जेरुसेलममा उनको परिवार भेट्न जाने योजना सुनाएकी थिइन्। तर, गोलीबारीपछि मात्र थाहा भयो, यारोनले इन्गेजमेन्टको लागि औंठी किनेका थिए र जेरुसेलममा प्रस्ताव गर्ने योजना बनाएका थिए।
यो जोडी आइतबार इजरायल उड्ने तयारीमा थियो। साराकी आमा न्यान्सी मिलग्रिम शुक्रबार वासिङ्टन पुगेर छोरीको कुकुर एन्डीको हेरचाह गर्ने योजनामा थिइन्। तर, बुधबार राति रबर्टको मोबाइलमा अमेरिकी यहूदी समितिको कार्यक्रमबाहिर गोलीबारी भएको समाचार आयो, जहाँ सारा शिकार बनेकी थिइन्।
न्यान्सीले लोकेसन एपमा छोरीको स्थान क्यापिटल यहूदी संग्रहालयमा देखिन्, जहाँ गोलीबारी भएको थियो। “मलाई लगभग थाहा भइसकेको थियो,” रबर्टले भने। त्यसपछि इजरायलका राजदूत येचिएल लेइटरले फोन गरेर सारा र यारोनको मृत्यु भएको पुष्टि गरे।
रबर्टले यो घटनालाई अक्टोबर ७, २०२३ मा हमासको आक्रमणपछि गाजामा युद्ध शुरू भएदेखि बढ्दो यहूदीविरोधी भावनासँग जोडे। “यो मेरो सबैभन्दा खराब डरको विस्तार हो,” उनले भने।
यारोन इजरायलमा जन्मेका थिए र जर्मनीमा केही वर्ष बसेर १६ वर्षको उमेरमा इजरायल फर्केका थिए। उनले हिब्रु विश्वविद्यालयमा अन्तरराष्ट्रिय सम्बन्ध र एसियाली अध्ययनमा स्नातक गरेका थिए। “उनी आदर्शवादी थिए, इजरायल र अन्य देशहरूबीच सम्बन्ध बनाउन चाहन्थे,” उनका शिक्षक प्रोफेसर निस्सिम ओटमाज्गिनले भने।
यारोन यहूदी बाबु र क्रिश्चियन आमाको परिवारमा हुर्केका थिए र क्रिश्चियन धर्म मान्थे। तर, दूतावासमा उनले आफूलाई यहूदीको रूपमा चिनाएका थिए। उनी इजरायली विदेश मन्त्रालयको कूटनीतिज्ञ तालिममा आवेदन दिने योजनामा थिए।
सारा र यारोन दुवैले मास्टर डिग्री हासिल गरेका थिए र दूतावासमा उत्साहपूर्वक काम गर्थे। सारा कोस्टा रिकामा बसेर अन्तरराष्ट्रिय मामिला र दिगो विकासमा मास्टर डिग्री हासिल गरेकी थिइन्। उनले बर्थराइट इजरायल कार्यक्रममा भाग लिएकी थिइन् र इजरायली-प्यालेस्टाइनी युवाहरूलाई जोड्ने संगठनमा काम गरेकी थिइन्।
“उनी आफूलाई मनपर्ने काम गरिरहेकी थिइन्,” रबर्टले भने। “राम्रो गर्नु नै उनको जीवनको अन्त्यको कारण बन्यो।”