प्रकाशित मिति : १२ असार २०८३, शुक्रबार
फोटो: होमल्याण्ड सेक्युरिटी
मियामी सिटी कमिसनको बिहीबारको बैठकमा आइससँगको साझेदारी खारेज गर्न माग गर्दै तीव्र विरोध प्रदर्शन भएको छ। भावुक र तनावपूर्ण बनेको उक्त बैठकमा क्युबाको राजनीतिक दमनबाट भागेर अमेरिका आएका एक नगर आयुक्त समेत आफ्ना आँसु थाम्न सकेनन्।
फ्लोरिडा राज्यले ट्रम्प प्रशासनको सामूहिक देश निकाला गर्ने एजेन्डालाई सक्रिय रूपमा सहयोग गरिरहेका बेला मियामीमा यो विवाद चर्किएको हो। फ्लोरिडा हाल स्थानीय प्रहरीलाई अध्यागमन कानुन कार्यान्वयन गर्ने अधिकार दिने ‘२८७(जी)’सम्झौता लागू गर्ने मामिलामा अमेरिकाकै अग्रणी राज्य बनेको छ।
जुन दिन यो बैठक बसिरहेको थियो, त्यही दिन अमेरिकी सर्वोच्च अदालतले ३ लाख ५० हजारभन्दा बढी हाइटीवासी र ६ हजार सिरियाली नागरिकको टिपीएस संरक्षण समाप्त गर्ने बाटो खोलिदिएको थियो। फ्लोरिडामा कुल हाइटीवासी टीपीएस धारकहरूको एक तिहाइभन्दा बढी हिस्सा बस्ने भएकाले यो निर्णय यहाँका लागि निकै संवेदनशील मानिएको छ। स्थिति खारेज भएमा उनीहरूलाई हिरासतमा लिने र राजनीतिक अस्थिरता तथा चरम हिंसा भोगिरहेको गृहदेश फर्काइने खतरा बढेको छ।
बैठकमा ५० भन्दा बढी सर्वसाधारणले सम्झौताको विपक्षमा बोलेका थिए। ‘फ्लोरिडा राइजिङ टुगेदर’ की मारिया रोड्रिगेजले भनिन्, यी अधिकारीहरूले परिवारहरूलाई लक्षित गर्दै देश निकालाका माध्यमबाट एकल महिला र अनाथहरू जन्माइरहेका छन्। यो निर्णयको ग्लानि तपाईंहरूले दशकौंसम्म बोक्नुपर्नेछ।
मियामीले सन् २०२५ को जुन महिनामा व्यापक जनविरोधका बावजुद ३-२ को मतले यो सम्झौता पारित गरेको थियो। तर एक वर्षमा मियामीको राजनीतिक परिदृश्य बदलिएको छ। नयाँ मेयर आइलिन हिगिन्स यस सम्झौताको आलोचक हुन् भने नवनिर्वाचित आयुक्त रोनाल्डो एस्कालोना पनि सम्झौता अन्त्य गर्ने पक्षमा खुला देखिएका छन्।
बैठकमा पाँचमध्ये तीन आयुक्तहरू-क्रिस्टिन किङ, रोनाल्डो एस्कालोना र डामियान पार्दोले कानुनी रूपमा सम्भव भएसम्म यो सम्झौताबाट बाहिरिन तयार रहेको स्पष्ट पारेका छन्।
यद्यपि, सिटी एटर्नी जर्ज वाइसोङले सम्झौता रद्द गरेमा राज्य सरकारले मियामीलाई दिँदै आएको वार्षिक ७५ लाख डलर अनुदान रोक्न सक्ने चेतावनी दिएका छन्। यसको जवाफमा आयुक्त किङले भनिन्, एउटा जीवन र परिवार बचाउनका लागि ७५ लाख डलर ठूलो कुरा होइन, हामी अन्य स्रोतबाट यो रकम जुटाउनेछौँ।
बैठकमा मियामी प्रहरी प्रमुख एड्विन लोपेज र सिटी म्यानेजर जेम्स रेयेसले प्रहरीले कसैको पनि जातीय प्रोफाइल नगरेको र आप्रवासी स्थितिबारे नसोधेको भन्दै सर्वसाधारणलाई आश्वस्त पार्ने प्रयास गरेका थिए। रेयेसका अनुसार हाल यस काममा मात्र दुई जना अधिकारीहरू आंशिक रूपमा खटिएका छन्।
तर आयुक्त एस्कालोनाका अनुसार यो विषय प्राविधिक पक्ष भन्दा पनि समुदायमा व्याप्त त्रास सँग जोडिएको छ। १२ वर्षअघि क्युबाको राजनीतिक उत्पीडनबाट भागेर अमेरिका आएका एस्कालोना बैठकमा निकै भावुक सुनिएका थिए।
आफ्ना सात महिनाका जुम्ल्याहा सन्तानको प्रसंग निकाल्दै उनले भने, म अमेरिकी नागरिक भइसक्दा पनि छोराछोरी जन्मेको दुई हप्तामै डरका कारण उनीहरूको राहदानी बनाउन दौडिएको थिएँ। म कानुन र व्यवस्थाको समर्थन गर्छु, तर मलाई लाग्छ हामी धेरै अगाडि बढिसक्यौँ, यो अति भयो।
अधिकारवादीहरूका अनुसार यस्ता सम्झौताले गर्दा आप्रवासीहरू पीडित वा साक्षी हुँदा समेत प्रहरीकहाँ अपराधको रिपोर्ट गर्न डराउँछन्, जसले समुदाय र प्रहरीबीचको विश्वास गुम्छ। मियामीको यो सम्झौता खारेज गर्ने प्रयासले आगामी दिनमा फ्लोरिडाका गभर्नर रन डिसान्टिसको प्रशासनसँग मियामी सहरको सिधा टक्कर पर्न सक्ने अनुमान गरिएको छ।