पासपोर्ट बनाउने नाममा नठगिन राहदानी विभागको सेवाग्राहीसँग आग्रह, एक-दुई हप्तामा सेवा सरल हुने जानकारी

राहदानी विभागले पासपोर्ट अर्थात् राहदानी बनाउने नाममा नठगिन सेवाग्राहीलाई सचेत गराएको छ ।

विभागले राहदानी बनाउन विभागमा आउने सेवाग्राहीलाई विभिन्न प्रलोभन देखाई रकम ठगी गर्न खोज्ने प्रवृत्ति देखापरेको भन्दै सचेत गराएको हो ।

विभागले उक्त ठगीमा संलग्न भएका शङ्कास्पद १५ जनालाई अहिलेसम्म नियन्त्रणमा लिई अनुसन्धान गरी आवश्यक कारबाहीका लागि नेपाल प्रहरीमा पठाइएको पनि जानकारी दिएको छ ।

विभागले यसप्रकार कुनै पनि बहानामा हुनसक्ने ठगीप्रति सचेत रहन र कुनै शङ्कास्पद गतिविधि गरेको पाइएमा कुनै माध्यमबाट सम्पर्क गर्न अनुरोध पनि गरेको छ ।

विभागले एक-दुई हप्तामा राहदानी सेवा सरल हुने जानकारी गराएको छ । विभागले सार्वजनिक सूचना जारी गरी अन्तरिम व्यवस्थापनका लागि विभागलगायत सम्बन्धित सबै निकायबाट प्रयास भएर सम्झौताको चरणमा पुगेको जानकारी दिएको हो । विभागले अबको १–२ हप्तामै सेवा सरल हुने सूचनामार्फत स्पष्ट पारेको छ ।

पछिल्ला दिनहरूमा अन्तरिम व्यवस्थापनस्वरूप राहदानी वितरणमा केही कटौती गर्नुपरेको विभागले बताएको छ ।

अहिलेको ठेकेदारले जिम्मेवारी हस्तान्तरण गर्ने र नयाँ ठेकेदार कम्पनीले जिम्मेवारी लिएर तीन महिनापछि पासपोर्ट छपाइको काम थाल्ने तयारी चलिरहेको छ । तर उसले वितरण गर्नु अगावै समस्या हुने भएपछि सरकार समाधान गर्न लागेको हो ।

अहिले राहदानी विभागसँग करिब डेढ लाख पासपोर्ट स्टक छ । अझै करिब तीन महिना पासपोर्ट बाँड्नुपर्ने भएकाले विभागले दैनिक दुई हजारको हाराहारीमा मात्रै पासपोर्ट बाँडिरहेको छ ।

अहिले परराष्ट्र मन्त्रालयले विशेष काम नपरी नयाँ पासपोर्ट नबनाउन आग्रह गरेको छ । जागिरका लागि विदेश जानुपर्ने, वैदेशिक रोजगारीबाट केही समयका लागि फर्किएकाहरू, बिरामीहरूको उपचार र सरकारी कामकाजमा जानुपर्नेहरूलाई प्राथमिकता दिएर पासपोर्ट वितरण गर्ने काम भइरहेको राहदानी विभागले जनाएको छ ।

सेवाग्राहीहरूलाई सरल, सहज र छिटो सेवा प्रवाह गर्न एवं राहदानीसम्बन्धी समस्याको तत्काल समाधान गर्न तयार रहेकोसमेत विभागले सार्वजनिक सूचनामार्फत जनाएको छ । (राससको सहयोगमा)